396.08
7.57
405.65
+17
Եղանակը Երևանում
Հայ

Ակադեմիական քաղաք և նոր բուհեր. հաստատվել է կրթության զարգացման պետական ծրագիրը

14:44
28 Հուլիսի 2022

ԵՐԵՎԱՆ, 28 հուլիսի./Նովոստի–Արմենիա/. Գործադիրի նիստում այսօր հավանության է արժանացել «Հայաստանի Հանրապետության կրթության մինչև 2030 թվականը զարգացման պետական ծրագիրը հաստատելու մասին» ՀՀ օրենքի նախագծի վերաբերյալ ՀՀ կառավարության օրենսդրական նախաձեռնությանը: Սահմանված կարգով այն կներկայացվի Ազգային ժողով՝ հաստատման:

Հարցը զեկուցել է ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանը՝ նշելով, որ կրթության ոլորտի զարգացման վերջին պետական ծրագիրն ընդունվել է 2011 թվականին՝ 2011-2015 թթ. համար: Նրա խոսքով՝ ժամանակի հրամայական է Կառավարության կողմից գերակա ճանաչված մարդկային կապիտալի զարգացման հայեցակարգային դրույթների ամրագրումը երկարաժամկետ պլանավորման փաստաթղթում:

«ՀՀ տնտեսական և հանրային կյանքի շարունակական և առաջանցիկ զարգացումը կարող է ապահովվել մարդկային կապիտալի զարգացման մեջ շոշափելի ներդրումներ կատարելու միջոցով։ Այս տեսանկյունից կրթությանն ուղղված ֆինանսական միջոցները ոչ թե ծախս են, այլ անհրաժեշտ ներդրում պետության և հասարակության զարգացման համար»,-նշել է փոխնախարարը:

Արթուր Մարտիորսյանը փաստել է՝ նախագծի մշակումը կատարվել է մասնակցային գործընթացով. այն քննարկվել է կրթության տարբեր շահակից խմբերի և լայն հանրության հետ՝ վերջնարդյունքում արժանանալով համընդհանուր հավանության: Նրա խոսքով՝ նախագիծը մի քանի անգամ քննարկվել է նաև ՀՀ վարչապետի մոտ և լրամշակվել քննարկումների արդյունքներով։ Մասնավորապես՝ հստակեցվել է մինչև 2030թ. արդյունքային շրջանակը, որը ներկայացված է կրթության բոլոր մակարդակները ներառող արդյունքներով։

Ներկայացնելով ծրագրի հիմնական դրույթները՝ Արթուր Մարտիրոսյանը շեշտել է, որ ծրագրի կենտրոնում մարդն է, իսկ նրա կարողությունների ընդլայնումը՝ մարդկային կապիտալը զարգացնելու և իրացնելու միջոց։ Ըստ նախարարի տեղակալի՝ կրթության զարգացման տեսլականն այն է, որ յուրաքանչյուր ոք օժտված է որոշակի տաղանդով, և կրթության համակարգի առաքելությունն է բացահայտել և հնարավորինս զարգացնել յուրաքանչյուրի տաղանդները՝ ընդլայնելով իր երկրում սեփական բարեկեցությունն ապահովելու անհատի հնարավորությունները, որի երաշխավորը պետք է լինեն մրցունակ տնտեսությունն ու կայուն պետությունը։

Արթուր Մարտիրոսյանի խոսքով՝ ծրագրի վերջնական նպատակն է՝ ձևավորել ազգային և համամարդկային արժեքների վրա հիմնված, ՀՀ զարգացմանը միտված արդյունավետ և միջազգայնորեն մրցունակ կրթական համակարգ, որը յուրաքանչյուրին, կյանքի բոլոր փուլերում, հնարավորություն կտա ստանալ իր կարիքներին և ընդունակություններին համապատասխան որակյալ կրթություն, ապահովել իր երկրում սեփական բարեկեցության կառուցման համար անհատի մրցունակ մասնագիտական պատրաստվածությունը, ինչպես նաև ակտիվ քաղաքացիական դիրքորոշումը:

Ծրագրի վերջնանպատակի իրականացման համար, ըստ Արթուր Մարտիրոսյանի, սահմանվել են հետևյալ երեք ռազմավարական ուղղությունները՝ համընդհանուր ներառական սովորողակենտրոն կրթական միջավայրի ստեղծում ՀՀ ողջ տարածքում, կրթության արդյունավետության բարձրացում և կրթական ծառայությունների ու արտադրանքի միջազգայնացում և արտահանում։

Նախարարի տեղակալը հնչեցրել է նաև փաստաթղթի՝ առավել նշանակալի հայեցակարգային դրույթները նախադպրոցական, հանրակրթության, ՄԿՈՒ, բարձրագույն և շարունակական կրթության ոլորտներում:

ՀՀ փոխվարչապետ Համբարձում Մաթևոսյանի խոսքով՝ նախագիծը մշտապես գտնվել է Վարչապետի ուշադրության կենտրոնում, և բոլոր քննարկումները տեղի են ունեցել հենց նրա գլխավորությամբ:

«Մենք մի քանի չափանիշներ ենք սահմանել. առաջինը՝ պետք է իրականացել մեր նախընտրական խոստումները, այս դեպքում՝ ՀՀ կառավարության 2021-2026 թթ. ծրագիրը: Մեզ համար շատ կարևոր է, որ ուսման վարձավճարի պատճառով բարձր առաջադիմություն և պատշաճ վարքագիծ դրսևորող որևէ ուսանող չզրկվի մասնագիտական ու բարձրագույն կրթություն ստանալու հնարավորությունից, կրթական ծառայությունները պետք է մատչելի լինեն ՀՀ քաղաքացիների համար իրենց իսկ բնակավայրում»,-նշել է փոխվարչապետը՝ ընդծելով, որ այս խնդիրը թիրախավորելու համար գործում է մեկ այլ ծրագիր, որը վերաբերում է 300 դպրոցի և 500 մանկապարտեզի մեծածավալ շինարարական աշխատանքներին, որոնք այս պահին ընթանում են ՀՀ բոլոր մարզերում և Երևանում:

Ռազմավարության մյուս կարևոր կետը, ըստ Համբարձում Մաթևոսյանի, վերաբերում է ակադեմիական քաղաքին, որն իր բնույթով, ֆիզիկական ենթակառուցվածքներով և բովանդակությամբ պետք է նոր չափանիշ սահմանի ոչ միայն ՀՀ-ի մասշտաբներով, այլև հնարավորինս հասանելի լինի Սփյուռքի մեր հայրենակիցների և օտարերկրյա ուսանողների համար: «Կրթության զարգացման պետական ծրագիրը թերևս միակ ոլորտային փաստաթուղթն է, որը պետք է հաստատվի Ազգային ժողովի կողմից, որով էլ ընդգծվում է փաստաթղթի կարևորությունը»,-փաստել է փոխվարչապետը:

ՀՀ վարչապետի աշխատակազմի ղեկավար Արայիկ Հարությունյանն իր հերթին նշել է, որ փաստաթուղթը բավականին երկար է քննարկվել. «Դրա պատճառն այն էր, որ մենք բոլոր ուղղություններով պետք է հասկանայինք մեր տեսլականը և հավատայինք դրա իրականացմանը: Առաջին հայացքից կարող է թվալ, որ 8 տարիների ընթացքում բարդ է նախանշված նպատակներին հասնելը, բայց վերջին 4 տարիների ընթացքում կրթության ոլորտում շատ ուղղություններով բավականին աշխատանք ենք արել ու առաջ գնացել»:

Նշենք, որ նախագիծը մշակվել է՝ հիմք ընդունելով ՀՀ կառավարության ծրագիրը, Հայաստանի՝ մինչև 2050 թվականը վերափոխման ռազմավարությունը, ՄԱԿ-ի գլխավոր ասամբլեայի կողմից ընդունված 2030 թվականի համար Կայուն զարգացման նպատակների մասին բանաձևը, մի շարք այլ ռազմավարական փաստաթղթեր։

Հավելենք, որ Ազգային ժողովի կողմից ծրագրի հաստատումից հետո ՀՀ կառավարությունը կհաստատի նաև ծրագրի իրականացման գործողությունների պլանը։–0–

Ծանոթացեք լուրերին առաջինն ու քննարկեք դրանք մեր Telegram-յան ալիքում

Partners News
ԱՌԿԱ գործակալություն
Բաժնի այլ նյութեր
17:23
02 Հոկտեմբերի 2022
Փաշինյանն արձագանքել է ադրբեջանցի զինծառայողների կողմից հայ ռազմագերիների գնդակահարության տեսանյութին
Փաշինյանն արձագանքել է ադրբեջանցի զինծառայողների կողմից հայ ռազմագերիների գնդակահարության տեսանյութին
17:11
02 Հոկտեմբերի 2022
Տեսանյութի իսկությունն այս պահին պարզել ենք, այն նոր է. ՄԻՊ-ը՝ ադրբեջանցիների կողմից հայ զինծառայողների գնդակահարության կադրերի մասին
Տեսանյութի իսկությունն այս պահին պարզել ենք, այն նոր է. ՄԻՊ-ը՝ ադրբեջանցիների կողմից հայ զինծառայողների գնդակահարության կադրերի մասին
13:46
02 Հոկտեմբերի 2022
Որևէ կասկած չկա, ադրբեջանական զինված ուժերին բնորոշ ձեռագիր է. ՊՆ-ն՝ հայ ռազմագերիների գնդակահարության մասին (ԷՔՍԿԼՅՈւԶԻՎ)
Որևէ կասկած չկա, ադրբեջանական զինված ուժերին բնորոշ ձեռագիր է. ՊՆ-ն մեկնաբանել է հայ ռազմագերիների գնդակահարության տեսանյութը
12:45
02 Հոկտեմբերի 2022
Եթե ապացուցվի իսկությունը, ապա սա ռազմական հանցագործություն է. ԵՄ հատուկ ներկայացուցիչն արձագանքել է հայ զինծառայողների մահապատժի կադրերին
Եթե ապացուցվի իսկությունը, ապա սա ռազմական հանցագործություն է. ԵՄ հատուկ ներկայացուցիչն արձագանքել է հայ զինծառայողների մահապատժի կադրերին
22:42
01 Հոկտեմբերի 2022
Զինծառայողը ծառայակցին շփոթել է հակառակորդի հետ և կրակահերթ արձակել. ՔԿ
Զինծառայողը ծառայակցին շփոթել է հակառակորդի հետ և կրակահերթ արձակել
13:00
01 Հոկտեմբերի 2022
24 ժամ ջուր չի լինի Երևանի 3 վարչական շրջանում, այդ թվում՝ Կենտրոնում
24 ժամ ջուր չի լինիԵրևանի 3 վարչական շրջանում, այդ թվում՝ Կենտրոնում
12:02
01 Հոկտեմբերի 2022
Մարտական դիրքում 19-ամյա զինծառայողի դի է հայտնաբերվել. ՊՆ
Մարտական դիրքում 19-ամյա զինծառայողի դի է հայտնաբերվել` դեռևս անհայտ հանգամանքներում ստացած հրազենային վիրավորումով
23:20
30 Սեպտեմբերի 2022
Փաշինյանը նշեց, թե ինչ պետք է լինի Հայաստանի և Ադրբեջանի միջև խաղաղության պայմանագրի հիմքում
Փաշինյանը նշեց, թե ինչ պետք է լինի Հայաստանի և Ադրբեջանի միջև խաղաղության պայմանագրի հիմքում
21:40
30 Սեպտեմբերի 2022
Փաշինյանը պարզաբանել է, թե ինչու չեն հրապարակվում զոհերի անուններն Ադրբեջանի վերջին ագրեսիայի հետևանքով
Փաշինյանը պարզաբանել է, թե ինչու չեն հրապարակվում զոհերի անուններն Ադրբեջանի վերջին ագրեսիայի հետևանքով
16:17
30 Սեպտեմբերի 2022
Ամենայն Հայոց Կաթողիկոսը հանդիպումներ է անցկացնում ՀՀ և ԼՂՀ նախագահների հաջորդ հանդիպումը նախապատրաստելու նպատակով
Ամենայն Հայոց Կաթողիկոսը հանդիպումներ է անցկացնում ՀՀ և ԼՂՀ նախագահների հաջորդ հանդիպումը նախապատրաստելու նպատակով
14:36
30 Սեպտեմբերի 2022
Վանաձորի երկու տարբեր ընտանիքներում 7–րդ երեխան է լույս աշխարհ եկել
Նախօրեին Վանաձորի երկու տարբեր ընտանիքներում 7–րդ երեխան է լույս աշխարհ եկել
13:02
30 Սեպտեմբերի 2022
Ֆրանսիան աջակցում է հայ–ադրբեջանական սահմանին միջազգային դիտորդական առաքելության տեղակայման գաղափարին. դեսպան
Ֆրանսիայի դեսպանը հայտարարել է, որ Ֆրանսիան աջակցում է հայ–ադրբեջանական սահմանին միջազգային դիտորդական առաքելության տեղակայման գաղափարին