Ադրբեջանական գերության մեջ գտնվող Մարալ Նաջարյանը տուն է վերադարձել (ՖՈՏՈ)

ԵՐԵՎԱՆ, 11 մարտի./Նովոստի–Արմենիա/. Բեյրութահայ Մարալ Նաջարյանը վերադարձել է տուն` Բեյրութ։ Նա բնակվում էր Շուշիում և նախորդ տարվա նոյեմբերից գտնվում էր ադրբեջանական գերության մեջ։

Դա հնարավոր է դարձել նաև ռուս ընկերների` Մոսկվայի իշխանությունների ներկայացուցիչների և ՌԴ Դաշնային խորհրդի նախագահ Վալենտինա Մատվիենկոյի շնորհիվ։

«Րոպեներ առաջ Մարալ Նաջարյանը հասավ տուն՝ Բեյրութ։ Բարի վերադարձ Մարալ», – գիշերը Facebook–յան իր էջում գրել է ԲՀԿ–ական Նաիրա Զոհրաբյանը։



Իրավապաշտպան, Արցախի նախկին օմբուդսմեն Ռուբեն Մելիքյանը Facebook–յան իր էջում շնորհակալություն է հայտնել Նաիրա Զոհրաբյանին, ով անձամբ է զբաղվել Նաջարյանի ազատ արձակման հարցով։



«Մարալ Նաճարյանը ազատ է արձակվել և այժմ Լիբանանում է՝ ընտանիքի հետ։ Այս գործը գլուխ բերելու համար՝ շնորհակալություն ԱԺ պատգամավոր Նաիրա Զոհրաբյանին, մի քանի ռուսաստանցի պաշտոնյաների, ինչպես նաև Լիբանանի Կարմիր Խաչին ու ՀՅԴ կառույցին։ Երբ պետությունդ բացարձակ զրո է, նման հարցերը լուծվում են անհատների նախաձեռնողականության ու կապերի շնորհիվ։ Նաիրա Զոհրաբյան ջան, վարձքդ կատար», – գրել է Մելիքյանը։

Մարալ Նաջարյանը Լիբանանի և Հայաստանի քաղաքացի է։ 2020թ.–ի օգոստոսին Բեյրութի նավահանգստում տեղի ունեցած պայթյունից հետո իր հարազատների հետ տեղափոխվել էր Հայաստան, այնուհետև բնակություն հաստատել Շուշիում։ Նաջարյանը հայտնվել էր ադրբեջանական գերության մեջ նոյեմբերի 10–ին Բերձորում (Լաչին), երբ գնացել էր Արցախ` անձնական իրերն ու գույքը վերցնելու համար։–0–