ԱԺ–ն առաջին ընթերցմամբ հավանություն է տվել գումարի դիմաց բանակից ազատվելու նախագծին․ ի՞նչ է նախատեսում այն

ԵՐԵՎԱՆ, 12 դեկտեմբերի․/Նովոստի–Արմենիա/․ Հայաստանի Ազգային ժողովը երեքշաբթի առաջին ընթերցմամբ հավանություն է տվել օրինագծին, որը նախատեսում է գումարի դիմաց զինվորական ծառայությունից ազատում կամ ծառայության ժամկետի կրճատում։

Օրենսդրական նախաձեռնության հեղինակը իշխող «Քաղաքացիական պայմանագիր» կուսակցության պատգամավոր Հայկ Սարգսյանն է։ Նախագծի համաձայն՝ 27 տարեկանից բարձր քաղաքացիները կարող են վճարել 2,5 մլն դրամ (մոտ 6,2 հազար դոլար) և երկու տարվա փոխարեն ծառայել 12 ամիս կամ վճարել 5 մլն դրամ (մոտ $12,4 հազ.) և ծառայել 6 ամիս կամ վճարել 10 մլն դրամ (գրեթե $25 հազար) և ծառայել 1 ամիս կամ ամբողջությամբ ազատվել ծառայությունից՝ վճարելով 15 մլն դրամ (մոտ 37,5 հազար դոլար)։

Նրա խոսքով, այս պահին կա մոտ 5 հազար քաղաքացի, ովքեր 27 տարեկան են, սակայն չեն անցել զինվորական ծառայությունը։

Նախագծի ընդունման դեպքում այն կտարածվի միայն այն քաղաքացիների վրա, ովքեր օրենքի ուժի մեջ մտնելու պահին արդեն 25 տարեկան են, և հետագայում չի տարածվի այն քաղաքացիների վրա, ովքեր ներկայումս պարտավոր են անցնել զինվորական ծառայություն։

Բացի այդ, Սարգսյանը ներկայացրեց նոր առաջարկ՝ եթե նախկինում ՀՀ քաղաքացիություն ստանալու պահին 27 տարեկան տղամարդիկ պարտավոր չէին զինվորական ծառայություն անցնել, ապա փոփոխություններով նախատեսվում է, որ նրանք կծառայեն 12 ամիս կամ բյուջե կվճարեն 2,5 մլն դրամ։

Միաժամանակ Սարգսյանը չնշեց տարիքի վերին շեմը, որից հետո նոր քաղաքացիներից չի պահանջվի ծառայել։ Նախագծում ևս դա նշված չէ:

Այս նախագծի վերաբերյալ կառավարության կարծիքը հայտնել է պաշտպանության փոխնախարար Արմեն Սարգսյանը։ Նա առարկություն է ներկայացրել 27 տարեկանը լրանալուց հետո ՀՀ քաղաքացիություն ստացած տղամարդկանց զինվորական ծառայության մասին կետի դեմ, քանի որ դա կխանգարի քաղաքացիություն ստանալուն։

Բացի այդ, կառավարությունն առաջարկում է զինվորական ծառայությունից խուսափած 18-ից 27 տարեկան քաղաքացիներին, ովքեր ցանկություն են հայտնել կատարել իրենց պարտքը, ծառայեն ոչ թե 24, այլ 30 ամիս։-0-