2017 թ.–ի ամենաընթերցված նյութերի թոփ տասնյակը «Նովոստի–Արմենիայից»

ԵՐԵՎԱՆ, 15 հունվարի. /Նովոստի–Արմենիա/. «Նովոստի–Արմենիա» գործակալությունը ներկայացնում է 2017 թ.–ի ամենաընթերցված նյութերի թոփ տասնյակը։

2017 թվականին Հայաստանում տեղի ունեցան կարևոր և առանցքային իրադարձություններ`ԱԺ ընտրությունները, Հայաստանը ԵՄ–ի հետ ստորագրեց համապարփակ և ընդլայնված գործընկերության համաձայնագիր, մեր երկրում առաջին անգամ լույս աշխարհ եկավ հնգյակ, Հենոն նվաճեց Եվրագավաթը և այլն։

Բայց այս իրադարձություններից ոչ բոլորն են ընդգրկվել «Նովոստի–Արմենիա» գործակալության ամենաընթերցված նյութերի թոփ տասնյակում։

Եվ այսպես, ինչն է հետաքրքրել և ինչ են կարդացել մեր ընթերցողները 2017 թ.–ին։

1. Ցնցող բացահայտում. գոյություն ունի կյանք մահից հետո, և գերմանացի գիտնականներն ապացուցել են դա (ՏԵՍԱՆՅՈՒԹ)

Մարդկանց հետաքրքրում է և, կարծես, միշտ էլ հետաքրքրելու է հավիտենական մի հարց`  գոյություն ունի՞ կյանք մահից հետո, թե՞ ոչ։ Բեռլինի Technische Universität–ի հոգեբաններն ու բժիշկները հանդես են եկել ցնցող հայտարարությամբ։ Փորձագետների խումբը պնդում է, որ գոյություն ունի կյանք մահից հետո, և դա ապացուցվել է կլինիկական գիտափորձերի միջոցով։ Հայտարարությունն արվել է իրականացված ուսումնասիրությունների արդյունքում։ Բժշկական հսկողության տակ իրականացվել են փորձարկումներ, որոնք հիվանդների մոտ հանգեցրել են մոտ 20 րոպե տևողությամբ կլինիկական մահվան, այնուհետև նրանց կրկին վերակենդանացրել են։ Ուսումնասիրությունները տևել են 4 տարի, մասնակցել է 944 կամավոր։ Արդյունքները ցույց են տվել, որ բոլոր կամավորները ունեցել են կլինիկական մահվան մասին հիշողություններ, որոնց մեծ մասը շատ նման են, սակայն եղել են որոշ տարբերություններ։ Կամավորներից շատերը զգացել են, թե ինչպես են կարծես «պոկվում» սեփական մարմնից, թեթևանում, հանգստանում։ Նրանք զգացել են նաև անվտանգություն, ջերմություն, ինչպես նաև վառ լույսի առկայություն։

2. Ինչպես նիհարել 10 կգ 7 օրում. շատ պարզ և արդյունավետ դիետա

Ավելորդ քաշից ազատվելու հարցը մարդկանց մտահոգող առանցքային խնդիրներից է։ «Նովոստի–Արմենիա»–ն փորձում է հաճախ անդրադառնալ այդ խնդրին` ներկայացնելով տարատեսակ դիետաներ, որոնցից մեկը հիմնված է հավկիթի վրա և չի վնասում առողջությանը։ Հավկիթում առկա սպիտակուցներն ու միկրոէլեմենտները թույլ չեն տա, որպեսզի օրգանիզմը հյուծվի, միաժամանակ բոլոր ավելորդ կիլոգրամներն անվերադարձ կանհետանան։

3. Հայաստանում ԱՄՆ դեսպանությունը փոխել է վիզաների տրամադրման կարգը Թրամփի հրամանագրից հետո

2017 թ.–ին ՀՀ–ում ԱՄՆ դեսպանությունը փոխեց ամերիկյան վիզաների տրման կարգը, «Նովոստի–Արմենիա» գործակալության հայտին ի պատասխան` տեղեկացրել էին ամերիկյան դիվանագիտական առաքելությունից։ Փոփոխություններն ուժի մեջ են մտել ԱՄՆ նախագահ Դոնալդ Թրամփի` Միացյալ Նահանգների իմիգրացիոն քաղաքականությունը խստացնող հրամանագրի կապակցությամբ։ Այժմ վիզայի համար երկրորդ անգամ դիմելու դեպքում անհրաժեշտություն կլինի անցկացնել հարցազրույց, եթե մուտքի նախորդ թույլտվության գործողության ժամկետի ավարտի պահից անցել է ավելի քան 12 ամիս։

4. Երևանում ծնված հնգյակի 24-ամյա հայրը նշել է, որ շոկի մեջ է (ԼՈՒՍԱՆԿԱՐՆԵՐ)

2017 թ.–ին տեղի ունեցավ Հայաստանի համար աննախադեպ մի իրադարձություն` Երևանի «Էրեբունի» ԲԿ–ում լույս աշխարհ եկավ հնգյակ` 4 աղջիկ և 1 տղա։ Սակայն, ցավոք, ողջ մնաց միայն աղջիկներից մեկը` Ռոզին, քանի որ երեխաներն անհաս էին, ծնվել էին 28 շաբաթականում։

5. ԿԸՀ նախնական տվյալներ. Ազգային ժողով է անցնում երեք քաղաքական ուժ

2017 թ.–ի ապրիլի 2–ին Հայաստանում կայացան Ազգային ժողովի ընտրություններ։ Ընտրություններին մասնակցեց հինգ կուսակցություն և չորս դաշինք` իշխող ՀՀԿ–ն, «Ազատ դեմոկրատներ», «Հայկական վերածնունդ» կուսակցությունները, ՀՅԴ–ն , Կոմունիստական կուսակցությունը, «Ելք» դաշինքը, «Ծառուկյան» դաշինքը, «Օհանյան–Րաֆֆի–Օսկանյան» դաշինքը, ՀԱԿ–ՀԺԿ դաշինքը։ ՀՀ կենտրոնական ընտրական հանձնաժողովը, ուսումնասիրելով 2009 ընտրատեղամասերից 143–ից ստացված արդյունքները, ապրիլի 3–ի գիշերը ներկայացրեց ԱԺ ընտրությունների առաջին արդյունքները։

6. Թեստ. ստուգեք ձեր ֆինանսական գիտելիքները

«Նովոստի–Արմենիա» գործակալությունը 2016 թ.–ի վերջին գործարկեց շատ հետաքրքրիր և ժամանցային մի բաժին` թեստեր, իսկ 2017 թ.–ին ՀՀ ԿԲ–ի հետ համատեղ գործարկվեց «Դրամապանակ» բաժինը, որը կոչված է բարձրացնել բնակչության ֆինանսական իրազեկվածության մակարդակը։ 2017 թ.–ին հրապարակվեց ֆինանսական գիտելիքներին վերաբերող մի թեստ, որն օգնում է պարզել գիտելիքների մակարդակը ֆինանսական ոլորտում, հասկանալ` ինչպես տնօրինել սեփական փողերը, ինչպես պլանավորել սեփական բյուջեն։

7. ԹԵՍՏ. գիտեք, արդյո՞ք, Հայաստանի ազգային բանակի ստեղծման պատմությունը

Հայաստանի ազգային բանակի ստեղծման պատմությանը վերաբերող մեր հերթական թեստը մեծ բում առաջացրեց սոցցանցերում։ Այն վերաբերում է Հայաստանի Զինված ուժերի պատմությանն և այդ պատմությունը կերտած մարդկանց։

8. Ձմռան անակնկալները Հայաստանում շարունակվելու են

Եղանակին վերաբերող նյութերը միշտ ամենաընթերցվածների շարքում են։ Դրանցից մեկը վերաբերում էր նախորդ տարի գրանցված ցրտաշունչ ձմռան կանխատեսմանը, երբ Երևանում գրանցվում էր մինչև 20 աստիճան ցուրտ։

9. Երեխան ոչ թե տոպրակի մեջ է եղել, այլ տոպրակով «փաթեթավորված». ընտանիքի հայրը մանրամասներ է պատմում Ջաջուռի դեպքից

Նախորդ տարի Հայաստանում, իսկ ավելի հստակ Ջաջուռում ահասարսուռ մի դեպք էր գրանցվել։ Գյուղի 30–ամյա բնակչուհին ծննդաբերել էր բակում գտնվող արտաքնոցում, և երեխան ընկել էր հորը։ Կնոջ ամուսինը ներկայացրել է դեպքի մանրամասները։

10. Մոսկվա–Երևան ավտոբուսը վթարի է ենթարկվել. բոլոր ուղևորները ՀՀ քաղաքացիներ են