ԵՐԵՎԱՆ, 3 մայիսի. /Նովոստի-Արմենիա/. Այսօր առավոտյան «Էրեբունի» ԲԿ–ում հնգյակ է լույս աշխարհ եկել։
Ժամը 04։00-ին Երևանի «Էրեբունի» բժշկական կենտրոնում, գլխավոր բժիշկ Միքայել Մանուկյանի անմիջական հսկողության ներքո, լույս աշխարհ են եկել Կարապետյանների ընտանիքի առաջնեկները՝ հնգյակ՝ 4 աղջիկ և 1 տղա։ Փոքրիկներին անվանակոչել են Աննա, Թեհմինե, Ռոզի, Լիլիթ և Արա։
Ինչպես shamshyan.com կայքին հայտնել է բժշկական կենտրոնի հիմնադիր տնօրեն, ՀՀ և ԱՀ առողջապահության նախկին նախարար Հարություն Քուշկյանը, «Էրեբունի» հիվանդանոցի պատմության մեջ սա առաջին դեպքն է, որ հնգյակ է ծնվել:
Քուշկյանը նշել է, որ երեխաներն ու մայրը գտնվում են բժիշկների հսկողության տակ և թե՛ իր, թե՛ հիվանդանոցի ողջ բուժանձնակազմի կողմից շնորհավորել է ընտանիքի անդամներին։
Կայքի հաղորդմամբ, երեխաների հայրը՝ 24-ամյա Վարդանը, ասել է, որ շոկի մեջ են:
«Սկզբում գիտեինք, որ եռյակ է ծնվելու, հետո պարզվեց, որ հնգյակ է։ Մեծ անհամբերությամբ եմ սպասել։ Նաև չափազանց ուրախ եմ։ Բալիկներս առողջ են ծնվել, մայրիկի մոտ նույնպես ամեն ինչ լավ է։ Խորին շնորհակալությունս եմ հայտնում բժշկական կենտրոնի բոլոր այն բժիշկներին, ովքեր մեր կողքին են», - ասել է Վարդանը։
Կայքի հաղորդմամբ, 40 տարվա աշխատանքային փորձ ունեցող ծննդատան ղեկավար Անդրանիկ Պողոսյանն էլ նշել է, որ 1980 թվականից սկսած՝ իր աշխատանքային ողջ գործունեության ընթացքում առաջին դեպքն է, որ հնգյակ է լույս աշխարհ եկել։
«Սա բացառիկ դեպք է։ Ունեցել ենք երկվորյակներ, եռյակներ, անցյալ տարի նաև քառյակ է ծնվել, բայց հնգյակի ծնվելու դեպքն առաջինն է», - ասել է նա։–0–
