2016 թվականին Հայաստանի հինգ ավագ դպրոցում հիմնանորոգում կիրականացվի

ԵՐԵՎԱՆ, 20 հունվարի. /Նովոստի–Արմենիա/.  2016 թվականին Հայաստանի հինգ ավագ դպրոցում հիմնանորոգում կիրականացվի, չորեքշաբթի լրագրողներին ասաց ՀՀ կրթության և գիտության նախարար Արմեն Աշոտյանը:

Այս աշխատանքները կիրականացվեն Համաշխարհային բանկի վարկային միջոցների հաշվին:

«2016 թվականին կմեկնարկի ևս 12 ավագ դպրոցի վերակազմավորման գործընթացը: Կմշակվի փաստաթղթերի փաթեթը: Այս ամենը ևս կիրականացվի Համաշխարհային բանկի վարկային միջոցներով»,-ասաց Աշոտյանը:

Համաշխարհային բանկի «Կրթության բարելավում» նոր հնգամյա ծրագիրը`  37,5  մլն, դոլոր արժողությամբ Հայաստանում մեկնարկել է 2015 թվականի սեպտեմբերին: Ծրագրի շրջանակում հանրապետությունում կնորոգվեն 17 ավագ դպրոց (յուրաքանչյուր մարզում ամենաքիչը մեկ դպրոց), ուսուցիչները վերապատրաստում կանցնեն, դպրոցները կապահովվեն անհրաժեշտ նյութերով և տեխնիկայով: -0-