Ընդդիմադիրները մտմտում են ընտրություններին դաշինքով մասնակցելու հարցը. թերթ

ԵՐԵՎԱՆ, 23 մարտի. /Նովոստի–Արմենիա/. «Հայկական ժամանակ» թերթի տեղեկություններով` ընդդիմության շրջանում մտմտում են 2017 թվականի ընտրություններին հնարավորինս լայն դաշինքով մասնակցելու հարցը:

Առայժմ միայն մտադրություններ են ճշտվում դաշինքի հնարավոր շրջանակը պարզելու համար, գրում է թերթը։

Ըստ թերթի լավատեղյակ աղբյուրների՝ խոսքը հիմնականում ՀԱԿ-ի, «Նոր Հայաստան» հանրային փրկության ճակատի, ՀԺԿ-ի և քաղաքացիական սեկտորի մի քանի վառ դեմքերի մասին է:

«Ճիշտ է, Ժիրայր Սեֆիլյանը մերժում է ընտրությունների ճանապարհը, բայց օրեր առաջ հայտարարեց, որ Ազատության հրապարակում քաղաքական ուժերի և ժողովրդի մոբիլիզացիայի վերջին փորձն են անելու»,  նշում են հոդվածի հեղինակները։

Ըստ թերթի տեղեկությունների, Սեֆիլյանի հետ համաձայնություն է ձեռք բերվել, որ այս փորձն էլ ձախողվելու դեպքում քննարկվելու է միասնական ուժերով ընտրությունների գնալու տարբերակը:

ՀԱԿ-ն այս ընթացքում փորձելու է պրոցես սկսել ԸՕ քննարկումների շուրջ և այն վերածել իշխանափոխության գործընթացի, հաջողության դեպքում այս երկու պրոցեսները կարող են միավորվել:

Որոշ գնահատականներով, չի բացառվում, որ «Նոր Հայաստանի» մի մասը միանա «Ժառանգությանը» և կուսակցության անվանափոխությամբ ստեղծվի նոր քաղաքական ուժ, գրում է թերթը։–0–