ԵՐԵՎԱՆ, 18 հունիսի./Նովոստի–Արմենիա/. «Հայաստան» դաշինքը, որը գլխավորում է նախկին նախագահ Ռոբերտ Քոչարյանը, առաջ է անցել վարչապետի պաշտոնակատար Նիկոլ Փաշինյանի գլխավորած «Քաղաքացիական պայմանագիր» կուսակցությանը պոտենցիալ ընտրողների թվով հունիսի 20–ին նախատեսված արտահերթ խորհրդարանական ընտրությունների նախաշեմին։ Այս մասին են վկայում Հայաստանի բոլոր մարզերում իրականացված սոցիոլոգիական հարցման արդյունքները, որոնք ներկայացրել է «GALLUP International Association»–ի հայկական ներկայացուցչության ղեկավար Արամ Նավասարդյանը։
Այսպես, «Ո՞ր քաղաքական ուժի օգտին ենք պատրաստվում քվեարկել» հարցին հարցվածների 28,7%–ը նշել է «Հայաստան» դաշինքը, 25,2%–ը` «Քաղաքացիական պայմանագիր» կուսակցությունը, 10,8%–ը` «Պատիվ ունեմ» դաշինքը, 5,4%–ը` «Բարգավաճ Հայաստան» կուսակցությունը, 5,2%–ը` «Լուսավոր Հայաստան» կուսակցությունը։
Հունիսի 11–ի հրապարակված հարցման արդյունքներով, պոտենցիալ ընտրողների 24,1%–ը հայտարարել է, որ կքվեարկի «Հայաստան» դաշինքի օգտին, իսկ 23,8%–ը` «Քաղաքացիական պայմանագիր» կուսակցության օգտին։
Նշվում է, որ «Քաղաքացիական պայմանագիրը» մեծ աջակցություն ունի գյուղական համայնքներում (32,9%) և փոքր աջակցություն Երևանում (16,4%)։ «Հայաստան» դաշինքի մոտ հակառակ պատկերն է` բարձր աջակցություն` Երևանում (35,2%) և փոքր աջակցություն գյուղերում (18,2%)։
«Հարցվածների 51,1%–ը հայտարարել է, որ միանշանակ կմասնակցի ընտրություններին, 11,4%–ը նշել է, որ ամենայն հավանականությամբ կմասնակցի, 13,8%–ը` ավելի շուտ չի մասնակցի, իսկ 22,9%–ը չի պատրաստվում մասնակցել ընտրություններին։ Դժվարացել է պատասխանել հարցվածների ընդամենը 0,7%–ը», – ասաց Նավասարդյանը։
Նա նշեց, որ միանշանակ ընտրություններին մասնակցող քաղաքացիների տոկոսը նվազել է` նախորդ հարցումների համեմատ։ Նրա կարծիքով, այդ նվազումը կապված է թեժ և լարված մրցակցային պայքարի, որոշակի բառամթերքի և իրադարձությունների հետ։
Հարցումն իրականացվել է հունիսի 14–16–ը հեռախոսի միջոցով։ Հարցմանը մասնակցել է 1105 մարդ։
Արտահերթ խորհրդարանական ընտրությունները նախատեսված են հունիսի 20–ին։ ԿԸՀ–ն գրանցել է 4 դաշինքի և 22 կուսակցությունների ընտրացուցակներ, սակայն «Հայոց արծիվներ» կուսակցությունը հրաժարավել է նախընտրական քարոզարշավից։–0–
