Քաոս Հայաստանի խաղալիքների շուկայում. ապրանքի գրեթե 90% վաճառվում էր առանց սերտիֆիկատի

ԵՐԵՎԱՆ, 13 նոյեմբերի. /Նովոստի Արմենիա/. Հայաստանում վաճառվող խաղալիքների գրեթե 90 տոկոսը սերտիֆիկատ չուներ, երկուշաբթի լրագրողների հետ զրույցում հայտնեց ՀՀ տնտեսական զարգացման և ներդրումների նախարարության Շուկայի վերահսկողության տեսչական մարմնի ղեկավար Լևոն Խալիկյանը։

«Ապրիլից Հայաստանի ամբողջ տարածքում իրականացված տեսչական ստուգումների արդյունքները ցույց տվեցին, որ վաճառվող խաղալիքների գրեթե 90 տոկոսը չուներ սերտիֆիկատ, որը վկայում է ապրանքի օգտագործման անվտանգության մասին։ Դա վաճառքի կոպիտ սխալ է համարվում», – նշեց Խալիկյանը։

Փորձագետի խոսքով, ստւգումներից հետո տնտեսվարող սուբյեկտները կարգավորել են իրենց փաստաթղթերը, ինչը թույլ է տալիս հայտարարել, որ այսօր հայկական շուկայում գրեթե բացակայում են սերտիֆիկատ չունեցող խաղալիքներ։

Միաժամանակ նա նշեց, որ Հայաստանում առողջության համար վտանգավոր խաղալիքներ չեն հայտնաբերվել։

«Հայաստանում սերտիֆիկատ չունեցող և վնասակար խաղալիքների հայտնաբերման վերջին դեպքն արձանագրվել է 2013 թվականին։ Այդ խաղալիքները ոչնչացվել են, իսկ հետագա չորս տարում երկրում չեն հայտնաբերվել առողջության համար վտանգավոր խաղալիքներ», – նշեց փորձագետը։

Միաժամանակ Խալիկյանը նշեց, որ Ամանորյա տոներին ընդառաջ գնորդները պետք է առավել զգոն լինեն։ Նա խորուրդ տվեց խաղալիքներ գնել միայն խոշոր մանկական խանութներից, որտեղ հնարավոր է տեսնել ապրանքի սերտիֆիկատը։ –0–