ԵՐԵՎԱՆ, 14 հունվարի. /Նովոստի–Արմենիա/. Հայաստանի պոլիկլինիկաները կշարունակեն աշխատել հանգստյան օրերին, հինգշաբթի լրագրողներին ասաց Հայաստանի առողջապահության նախարար Արմեն Մուրադյանը։
Ըստ նրա, վերջին 20 օրերին նշվում է ՍՇՎ կտրուկ աշխուժացում, ինչը կապված է եվրոպական տարածաշրջանում վիրուսի ակտիվացման հետ` կապված կտրուկ ցրտի և տոնական օրերին սերտ շփումների հետ։
Նա նշեց, որ տոնական օրերին հանրապետության առողջապահության ողջ համակարգն աշխատել է արտակարգ ռեժիմով, ստեղծվել է արագ արձագանքման խումբ նախարարի գլխավորությամբ, տոնական օրերին պոլիկլինիկաներն աշխատել են ժամը 10։00–ից մինչև 14։00, իսկ հանգստյան օրերին` մինչև 17։00։
«Այսօր որոշում է ընդունվել, որ պոլիկլինիկաները կաշխատեն նաև հանգստյան օրերին, որ առավելագույնս թուլացնեն հիվանդանոցների բեռնվածությունը` հաշվի առնելով որոշակի անհանգստությունը հիվանդների կուտակման և բժիշկներին դիմելու թվի աճը` ներհիվանդանոցային վարակների տարածումից խուսափելու համար»,– ասաց Մուրադյանը։
Նախարարը միաժամանակ ընդգծեց ժամանակին բուժօգնության դիմելու անհրաժեշտությունը` բարդություններից խուսափելու համար։
Նա նշեց, որ բարդությունները կապված են բժշկական հաստատություններ ուշ (4-5–րդ օրը) դիմելու, ինչպես նաև ուղեկցող հիվանդությունների` շաքարախտի, չարորակ ուռուցքների, սիրտ–անոթային համակարգի խնդիրների, ճարպակալման և այլ գանգատների հետ։ Նա ավելացրեց, որ բարդություններ կարող են առաջանալ նաև հղիության ժամանակ։
Աշոտյան. դպրոցների և նախադպրոցական հաստատությունների արձակուրդները կերկարացվեն մինչև հունվարի 25–ը>>
Համաձայն, Առողջապահության նախարարության հաղորդման, հունվարի 14-ի ժամը 10.00-ի տվյալներով` սուր շնչառական վարակներով ստացիոնար դիմելիությունը կազմել է 948 դեպք, որից 796-ը` 0-18 տարեկան: Թոքաբորբով հոսպիտալացվածները 422-ն են, որից 199-ը` 0-18 տարեկան։ Սուր շնչառական վարակներով և թոքաբորբերով հոսպիտալացվել է 114 հղի։ Վերակենդանացման բաժանմունքներում բուժում է ստանում 92 հիվանդ։
Երեկ «Էրեբունի» բժշկական կենտրոնում մահացել է 1954թ. ծնված կին, ով տառապում էր սրտի իշեմիկ հիվանդությամբ, ուներ շաքարային դիաբետ։
Կնոջ մոտ հաստատվել էր գրիպի Ա տեսակի H1N1 ենթատեսակը։
Տեղեկացնենք, որ «Սուրբ Գրիգոր Լուսավորիչ» բժշկական կենտրոնում մահացած ծննդկանի մոտ լաբորատոր հետազոտությամբ գրիպի Ա տեսակի H1N1չի հայտնաբերվել։ 28 շաբաթական հղիության ժամանակ կեսարյան հատմամբ ծննդալուծված կնոջ վիճակը տևական ժամանակ ծայրահեղ ծանր էր։
Նշենք, որ H1N1 վարակից արձանագրվել է մահվան 11 դեպք, որից 3-ը` 2015 թվականին:
ՀՀ առողջապահության նախարարության միջնորդությամբ հանրակրթական, նախնական և միջին մասնագիտական ծրագրեր իրականացնող պետական ուսումնական հաստատություններում երկարացվել են արձակուրդները: -0-
