Խորհրդարանական ընտրություններում, ԿԸՀ–ի ընթացիկ տվյալներով, շարունակում է առաջատարի դիրք զբաղեցնել երեք քաղաքական ուժ

ԵՐԵՎԱՆ, 3 ապրիլի. /Նովոստի–Արմենիա/. ՀՀ ԿԸՀ–ն ներկայացրել է խորհրդարանական ընտրությունների առաջին արդյունքները հանրապետության 2009 ընտրատեղամասերից 363–ի քվեաթերթիկների մշակման արդյունքում։

Այսպիսով, ՀՀԿ–ն հավաքում է ձայների 53,20 տոկոսը, «Ծառուկյան» դաշինքը` 26,56 տոկոսը, ՀՅԴ–ն` 8,04 տոկոսը։

Միաժամանակ, «Հայկական վերածնունդը» հավաքում է ձայների 3,77 տոկոսը, «Ելքը»` 3,92 տոկոսը, «Օհանյան–Րաֆֆի–Օսկանյան» դաշինքը` 2,24 տոկոսը, «Կոնգրես–ՀԺԿ» դաշինքը` 1,24 տոկոսը, «Ազատ դեմոկրատներ» կուսակցությունը` 0,59 տոկոսը, Հայաստանի կոմունիստական կուսակցությունը` 0,45 տոկոսը։

ԿԸՀ տվյալներով, քվեարկությանը մասնակցելու իրավունք ունեցող քաղաքացիների թիվը կազմում է 2 587 706 մարդ։ Ընտրություններին քվեարկել է 1 574 947 ընտրող կամ ընդհանուր ընտրազանգվածի 60,86 տոկոսը։

Խորհրդարան անցնելու համար սահմանված է շեմ, որը կուսակցությունների համար կազմում է 5 տոկոս, դաշինքների համար` 7 տոկոս։

Ապրիլի 2–ին հանրապետությունում անցկացվեցին վեցերորդ գումարման խորհրդարանի ընտրությունները, որոնց մասնակցում էր հինգ կուսակցություն և չորս դաշինք։ Այս ընտրություններն ուշագրավ են նրանով, որ երկրի պատմության մեջ առաջին անգամ քվեարկությունը տեղի է ունենում 100 տոկոսանոց համամասնական համակարգով: Այս ընտրություններն առաջին համապետական ընտրություններն են 2015 թ.-ի սահմանադրական փոփոխություններից հետո, որոնք նախատեսում են անցում խորհրդարանական իշխանավարման գործող նախագահի լիազորությունների ժամկետի ավարտից հետո` 2018 թ.–ին։

BS/The Gallup Organization–ի և Հայկական սոցիոլոգիական ասոցիացիայի կողմից անցկացված Exit Poll–ի նախնական տվյալներով, ՀՀ ազգային ժողով է անցնում չորս քաղաքական ուժ` ՀՀԿ–ն , «Ծառուկյան» դաշինքը, «Ելք» դաշինքն ու ՀՅԴ–ն։–0–