Հայաստանին հզոր ցիկլոն է մոտենում. սպասվում է ջերմաստիճանի նվազում

ԵՐԵՎԱՆ, 29 մարտի. /Նովոստի Արմենիա/. ԱԻՆ-ը հայտնում է Հայաստանին մոտեցող հզոր ցիկլոնի մասին:

«Մարտի 30-ի ցերեկը հզոր ցիկլոնի ներթափանցմամբ պայմանավորված, հատկապես կեսօրից հետո հանրապետության ողջ տարածքում սպասվում են հանձրևի տեսքով առատ տեղումներ, ամպրոպ, ամպրոպների ժամանակ` քամու ուժգնացում` 15-20 մ/վ։ Անձրևները հատկապես առատ կլինեն Շիրակում, Լոռիում, Տավուշում, Կոտայքում, Գեղարքունիքում, Արարատում և Երևանում», - նշվում է տարածած հաղորդագրությունում։ 

Մարտի 31-ի առավոտյան ժամերից անձրևներն աստիճանաբար կդադարեն, ապրիլի 1-2-ը հանրապետության ողջ տարածքում սպասվում է առանց տեղումների եղանակ։

Նշվում է նաև, որ օդի ջերմաստիճանը մարտի 30-ի ցերեկը կնվազի 5-6 աստիճանով, իսկ ապրիլի 1-2-ը նույնքանով կբարձրանա։-0-