Գրիպի հետ կապված իրավիճակը ՀՀ–ում հեռու է համաճարակից

ԵՐԵՎԱՆ, 20 հունվարի. / Նովոստի–Արմենիա/. Գրիպի հետ կապված իրավիճակը Հայաստանում հեռու է համաճարակից և նույնիսկ համաճարակային բռնկումից, չորեքշաբթի լրագրողներին ասաց Հայաստանի առողջապահության նախարար Արմեն Մուրադյանը։

Ըստ նրա, Հայաստանը շատ հեռու էր համաճարակից նույնիսկ այն ժամանակահատվածում, երբ հիվանդանոցներ դիմածների թիվը բարձրակետում էր։

«Մենք միանշանակ շատ հեռու էինք համաճարակային բռնկումից, և համաճարակ հայտարարելու անհրաժեշտություն չկար։ Մենք կանխարգելիչ միջոցառումներ անցկացրինք միայն դպրոցներում և նախադպրոցական հաստատություններում պարապմունքները դադարեցնելու տեսքով, ինչը բավարար համարեցինք վիրուսի տարածումը կանխելու համար»,– ասաց Մուրադյանը։

Նախարարը նշեց, որ երկրում իրավիճակի զարգացումը հարևան երկրներում շահարկումների առիթներ է տվել, ընդգծելով, որ հայկական ԶԼՄ–ներում իրավիճակի թափանցիկ և հավաստի լուսաբանման շնորհիվ դրանք մնացին շահարկումների մակարդակում։

Նա հայտնեց նաև, որ համապատասխան քայլեր են ձեռնարկվում սահմանում, որոնք նույնիսկ նկատելի չեն միջին վիճակագրական քաղաքացու համար։

Նախարարը կոչ արեց քաղաքացիներին շարունակել ՍՇՎ–ի տարածումից պաշտպանվելու որոշակի միջոցառումներ կատարել, մասնավորապես, խուսափել սերտ շփումից, հիվանդության դեպքում չանցնել անձնական սերտ շփումների և կանխարգելիչ քայլեր իրականացնել, ժամանակին դիմել բժիշկի։

Մուրադյանը չբացառեց նաև ժողովրդական միջոցների կիրառումը վիրուսների տարածումը կանխելու համար, նշելով, որ դեմ չէ դրանց, «առավել ևս, որ դրանք հաճախ շատ արդյունավետ» են լինում։

Առողջապահության նախարարության վերջին տվյալներով, հունվարի 18–ի դրությամբ ՍՇՎ–ով գրանցված 1230 հիվանդներից այս պահին հիվանդանոցում է 982 մարդ, հիվանդանոցում բուժվող երեխաների թիվը 1066–ից կրճատվել է մինչև 890, իսկ 124 հղիներից բժիշկների վերահսկողության ներքո են մնում 94–ը։

Ներկայում Հայաստանում գրանցվել է H1N1 ենթատեսակի գրիպի վիրուսի բարդություններից մահվան 18 դեպք, միաժամանակ, մահացածները տառապել են ուղեկցող այլ քրոնիկ հիվանդություններով։-0-