ԵՐԵՎԱՆ, 16 նոյեմբերի. /Նովոստի–Արմենիա/. «Մանկական Եվրատեսիլի» հայ մասնակիցը` Միկան (Միքայել Վարոսյանը) «LOVE» երգով հանդես կգա տասնմեկերորդ համարի ներքո նոյեմբերի 21-ին, համերգային ծրագրի երկրորդ մասում:
Այս մասին ասվում է ֆեյսբուք սոցիալական ցանցի Միկայի էջում:
Առաջինը հանդես կգա Սերբիայի ներկայացուցիչը, նրանից հետո Վրաստանի, Սլովենիայի, Իտալիայի, Հոլանդիայի, Ավստրալիայի, Իռլանդիայի, Ռուսաստանի, Մակեդոնիայի, Բելառուսի ներկայացուցիչները:
Միկայից հետո, ով արդեն առաջին փորձերն է արել Բուլղարիայում, ելույթ կունենան Ուկրաինայի, Սան-Մարինոյի, Մալթայի, Ալբանիայի և Չեռնոգորիայի պատանի երաժիշտները:
Այս տարի «Մանկական Եվրատեսիլ 2015»-ն կանցկացվի նոյեմբերի 21-ին Բուլղարիայի մայրաքաղաք Սոֆիայում, Armeec համերգասրահում «Discover» («Բացահայտիր») կարգախոսով:
Հայաստանը «Մանկական Եվրատեսիլին» մասնակցում է 2007թ.–ից։ Առաջին անգամ մրցույթին Հայաստանը ներկայացրել է «Արևիկ» մանկական խումբը` «Երազանք» երգով` զբաղեցնելով երկրորդ տեղը։ 2008թ.–ին Մոնիկա Մանուչարյանը ներկայացել է «Իմ երգի հնչյունները» երգով և զբաղեցրել ութերորդ տեղը։ 2009թ.–ին Լաուրա Հայրապետյանն իր «Բարսելոնա» երգով նվաճեց երկրորդ տեղը`այդ տեղը կիսելով Ռուսաստանի ներկայացուցիչ Եկատերինա Ռյաբովայի հետ։
Մեկ տարի անց «Մանկական Եվրատեսիլ» մրցույթին Մինսկում հաղթող ճանաչվեց Հայաստանը ներկայացնող ԼՂՀ 12–ամյա քաղաքացի Վլադիմիր Արզումանյանը, իսկ 2011թ.–ին մրցույթն անցկացվեց Երևանում, որտեղ Հայաստանը ներկայացրեց պատանի երգչուհի Դալիթան։ Compass Band հայկական խումբը, որը 2012թ.–ին Ամստերդամում ներկայացրեց Հայաստանը, զբաղեցրեց երրորդ տեղը։
2013 թվականին Հայաստանի ներկայացուցիչ Մոնիկա Ավանեսյանը Կիևում անցկացված մրցույթում զբաղեցրեց 6–րդ տեղը։ –0–-
Ծանոթացեք լուրերին առաջինն ու քննարկեք դրանք մեր Telegram-յան ալիքում
