ԵՐԵՎԱՆ, 9 սեպտեմբերի. /Նովոստի-Արմնեիա/. «ԱրմենՏել» ընկերությունը (ապրանքանիշը` Beeline) և Մայքրոսոֆթ ինովացիոն կենտրոն Հայաստանը հայտարարում են «Հեքըթոն» նորարար գաղափարների և ծրագրավորման մրցույթի մասնակցության հայտերի ընդունման մեկնարկի մասին։
Ինչպես հայտնեցին ընկության մամուլի ծառայությունից, մրցութի նպատակն է խրախուսել տեխնիկական ու հումանիտար մասնագիտություններ ունեցող երիտասարդներին զբաղվել տեխնոլոգիական ձեռներեցությամբ և առաջարկել հեռահաղորդակցության ոլորտին վերաբերող թվային ու նորարար լուծումներ։
Մրցույթին մասնակցելու համար անհրաժեշտ է մինչև սույն թվականի սեպտեմբերի 25-ը ներկայացնել դիմում-հայտ հետևյալ
հղումով: «Հեքըթոն»–ն այս տարի կանցկացվի հոկտեմբերի 1-ին, Երևանում։
Մրցույթի ընթացքում մասնակից թիմերը 12 ժամվա ընթացքում պետք է մշակեն հեռահաղորդակցության ոլորտին վերաբերող տարբեր լուծումների փորձնական տարբերակներ, որոնք այնուհետև կներկայացվեն մասնագետների և մենթորների դատին։ Հայաստանյան լավագույն մասնագետներից կազմված հանձնաժողովը, մրցույթի վերջում ծանոթանալով ներկայացված լուծումներին, կորոշի լավագույններին՝ որպես ընտրության չափանիշ կիրառելով 12 ժամում կատարված աշխատանքը, ինչպես նաև գաղափարի նորարարությունը և հետաքրքիր լինելը։ Հաղթող թիմերը կստանան 1000 և 500 դոլարին համարժեք գումարի չափով մրցանակներ:
«Կարելի է ասել, որ հեռահաղորդակցության ոլորտն ամենաարագ փոփոխվող և զարգացող ոլորտներից մեկն է, և մենք, որպես նորարար ընկերություն, մշտապես գտնվում ենք այս փոփոխությունների էպիկենտրոնում։ Beeline-ը ոչ միայն յուրաքանչյուր օր փորձում է իր բաժանորդներին առաջարկել ժամանակակից ծառայություններ, այլ չափազանց կարևորում է թվային նորարարություններին ուղղված նման նախագծերի իրականացումը։ Համոզված եմ, Մայքրոսոֆթ ինովացիոն կենտրոնի հետ համատեղ կազմակերպված մրցույթի շրջանակում ներկայացված գաղափարներից մի քանիսը կդառնան հերթական նշանակալի երևույթը հեռահաղորդակցության ոլորտում», – նշել է Հայաստանում Beeline-ի գլխավոր տնօրեն Անդրեյ Պյատախինը:
Մայքրոսոֆթ ինովացիոն կենտրոնի տնօրեն Արտաշես Վարդանյանի խոսքով, ՏՏ աշխարհում ընդունված պրակտիկա է անցկացնել թեմատիկ հեքըթոններ, որոնց ժամանակ մշակվում են կոնկրետ ոլորտի որոշակի խնդիրների նորարար լուծումներ։ «Այս տարի համագործակցելով Beeline Հայաստանի հետ` փորձում ենք մշակել հետաքրքիր և ստեղծարար լուծումներ հեռահաղորդակցության խնդիրների վերաբերյալ, որոնք հետագայում կարող են դառնալ պահանջարկ վայելող պրոդուկտներ։ Մայքրոսոֆթ ինովացիոն կենտրոնի փորձը ցույց է տալիս, որ հեքըթոններից ծնվում են բազմաթիվ գաղափարներ, որոնք դառնում են շահավետ բիզնես», - նշել է նա։
Սեպտեմբերի 16-ին և 17-ին մրցույթին մասնակցել ցանկացողների համար կանցկացվեն տեղեկատվական հանդիպումներ, որտեղ կներկայացվեն հեռահաղորդակցության այն հիմնական ուղղությունները, որոնց վերաբերյալ թիմերը պետք է առաջարկեն իրենց լուծումներ։
«Հեքըթոն» մրցույթի գրանցման վերաբերյալ, ինչպես նաև լրացուցիչ տեղեկատվություն ստանալու համար կարելի է զանգահարել (010) 545 343 կամ (099) 545 343 հեռախոսահամարներով։
«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ։ -0-
