Երևանում` ԱԳՆ–ի շենքի դիմաց, բողոքի ցույց է անցկացվում` ընդդեմ ԵԱՀԿ ՄԽ–ի պասիվ գործունեության

ԵՐԵՎԱՆ, 9 ապրիլի./Նովոստի–Արմենիա/.ՀՀ արտգործնախարարության շենքի դիմաց այս րոպեներին բողոքի ցույց է անցկացվում` ընդդեմ ԵԱՀԿ Մինսկի խմբի պասիվ գործունեության, դեպքի վայրից հաղորդում է «Նովոստի–Արմենիա» գործակալության թղթակիցը։

Այս րոպեներին Արտգործնախարարության շենքում անցկացվում է ՀՀ ԱԳ նախարար Էդվարդ Նալբանդյանի և ԵԱՀԿ Մինսկ խմբի համանախագահների հանդիպումը։

Ցուցարարները թափահարում են Հայաստանի և Լեռնային Ղարաբաղի Հանրապետության դրոշները, որոշ ցուցարարների ձեռքում կան պաստառներ, որոնց վրա գրված է «Ալիևը մարդասպան է», «Ղարաբաղն անկախ է»։ Ցուցարարները վանկարկում են «Արցախը մերն է»։

Կազմակերպիչները հայտարարել են, որ պատրաստվում են սպասել մինչև ԵԱՀԿ ՄԽ համանախագահները դուրս գան նրանց մոտ:

Ակցիայի կազմակերպիչները նշում են, որ Ադրբեջանի կողմից ապրիլի 2-ին ԼՂՀ սահմանի ողջ երկայնքով սանձազերծված քառօրյա պատերազմը և դրան հաջորդած փխրուն զինադադարը, մինչ այս պահը որևէ հստակություն չեն մտցրել հակամարտության կարգավորման տեսլականի մեջ։

«Ռազմական գործողությունների ընթացքում նկատվեց միջազգային հանրության և, հատկապես, հակամարտության կարգավորման գործում առաջնային ներգրավվածություն ունեցող կառույցների և երկրների մի մասի հանցավոր լռությունը կամ ոչ պակաս հանցավոր հավասարության նշան դնելը ՀՀ, ԼՂՀ և Ադրբեջանական կողմի գործողությունների մեջ», - ասվում է հայտարարության մեջ։ 

Ապրիլի 1-ի լույս 2-ի գիշերը ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։–0–