«Վանաձոր քիմպրոմում» 94 տ հեղուկ ամոնիակ կա. այն կարող է դառնալ մասսայական թունավորումների պատճառ

ԵՐԵՎԱՆ, 9 նոյեմբերի. /Նովոստի–Արմենիա/. «Վանաձոր քիմպրոմը», ինչպես հայտնի է, գտնվում է լուծարման ու ապամոնտաժման փուլում, մինչդեռ գործարանում առկա քիմիական բազմաթիվ նյութեր լուրջ վտանգ են պարունակում վանաձորցիների համար, գրում է «Հայկական ժամանակը»։

Գործարանում պահպանություն չի իրականացվում, քիմիական նյութերի պահման պայմանները առավել քան վտանգավոր ու անթույլատրելի են՝ վթարային ազդանշանի համակարգը գործարանում անջատված է:

««Վանաձոր քիմպրոմում» ամենավտանգավորը թերևս գործարանում առկա մոտ 94 տ հեղուկ ամոնիակն է և մոտ 4,25 տ ամոնիակաջուրը, որոնք պահպանվում են նոր պահեստարանի 6 բաքերում: Ժամանակի ընթացքում ամոնիակի պահպանման բաքերը, խողովակները և սարքավորումները քայքայվել են: Պահեստարանում սպասարկման աշխատանքներ չեն իրականացվում», – գրում են հոդվածի հեղինակները։

Լոռու մարզային փրկարարական վարչության պետ Կարեն Հովհաննիսյանը թերթի հետ զրույցում նշել է, որ շոգ եղանակներին հեղուկ ամոնիակը տաքանալու հետևանքով սկսում է գոլորշիանալ, ապա բաքերում ճնշումը մեծանում է և կարող է պայթյունի պատճառ դառնալ։

«Նախկինում եղել է հսկողություն բաքերում ճնշման նկատմամբ, և դրա բարձրացման ժամանակ գոլորշին ուղղորդվել է դեպի ամոնիակաջուր պարունակող բաք: Քանի որ պահեստարանում էլեկտրասնուցում չկա, ապա չի գործում նաև վթարային՝ վերգետնյա բաքերից մեկի վնասման դեպքում պահեստարանի տակ գտնվող ստորգետնյա պահեստային բաք ամոնիակի արտահոսքն ապահովող ավտոմատ համակարգը», – նշել է Հովհաննիսյանը։

Թերթի հաղորդմամբ, մասնագետներից կազմված խումբը ուսումնասիրություններ է իրականացրել գործարանի տարածքում, ներկա ու սպասվելիք վտանգների մասին տեղյակ են բոլոր կառույցներում, սակայն խնդրին վերջնական լուծում տալ և աղետը կանխել չի շտապում և ոչ ոք:

«Նախ պարզ չէ, թե որ բաքում ինչքան ամոնիակ կա: Մենք միայն գիտենք, որ 6 բաքերում կա 94 տոննա ամոնիակ, եթե անգամ բաքերից մեկից արտահոսք լինի, քիմիական վտանգավոր նյութերից մասսայական թունավորումներ կլինեն»,-ասել է Կարեն Հովհաննիսյանն ու հավելել, որ ամոնիակի պահպանման ներկայիս պայմանները չեն համապատասխանով անհրաժեշտ չափանիշներին։

«Լուծումը հետևյալն է՝ կամ պետք է պահպանման համակարգ, էլեկտրասնուցում ու սպասարկող համակարգ, կամ՝ տեղափոխում, սակայն Հայաստանը չունի տրանսպորտային միջոց դրանք տեղափոխելու համար…», – ասել է Հովհաննիսյանը։

Կարեն Հովհաննիսյանի խոսքով՝ իրենք հարցը վերջերս մեկ անգամ ևս բարձրացրել են պատկան մարմինների մոտ՝ հնարավոր լուծումը գտնելու և վտանգը կանխելու վերաբերյալ:

Հաջորդ ամենալուրջ ու օրակարգային խնդիրը քիմգործարանում հնարավոր վթարի դեպքում ահազանգի համակարգի բացակայությունն է, ինչն էլ կհանգեցնի աղետին ուշ արձագանքման: Բարձրացված խնդիրը պետք է լուծվի կառավարական մակարդակով, գրում է թերթը։–0–