ԵՐԵՎԱՆ, 15 հունվարի./Նովոստի–Արմենիա/. ՀՀ առողջապահության նախարարի պաշտոնակատար Արսեն Թորոսյանը Facebook–յան ուղիղ եթերում թարմ տեղեկություններ է ներկայացրել այս պահին ՍՇՎ–ի հետ կապված իրավիճակի մասին Հայաստանում։
«Ճիշտ է մենք այսօր հանդես ենք եկել հայտարարությամբ, բայց կան ավելի թարմ տվյալներ, որոնցով ուզում եմ ձեզ հետ կիսվել», – նշել է նախարարի պաշտոնակատարը` ընդգծելով, որ իրավիճակը, լինելով ակտիվ, ամեն դեպքում կայուն է։
«Այսօրվա տվյալները խոսում են դեպի կայունացում, անկում գնալու մասին։ Օրինակ, եթե վերցնենք դպրոցներում և մանկապարտեզներում սուր շնչառական վարակներով երեխաների բացակայությունները, ապա մենք ունենք ընդամենը 2,4տոկոս բացականեր ամբողջ հանրապետությունում», – ասել է Թորոսյանը։
Նա ներկայացրել է նաև ՍՇՎ–ով պայմանավորված շտապօգնության կանչերի հետ կապված իրավիճակը։
«Արդեն 3–րդ օրն է ունենք շտապօգնության կանչերի նվազում, ինչը խոսում է այն մասին, որ հիվանդացությունը կայունանում և նվազում է», – ընդգծել է Արսեն Թորոսյանը։
Նրա խոսքով, գրանցվում է նաև հանրապետության վերակենդանացման բաժանմունքներում ՍՇՎ–ով հոսպիտալացված հիվանդների թվի իջեցում։
Загружается новость ... "Лево"
«Արդեն 2–րդ օրն է ունենք հիվանդանոցների բաժանմունքներում հոսպիտալացվածների թվի կայունացում, այսինքն կտրուկ աճ կամ աճ ընդհանրապես չունենք։ Հիմա մենք հիվանդանոցներում ավելի շատ ունենք դուրս գրումներ, քան ընդունելություններ։ Դա էլ է խոսում իրավիճակի կայունացման մասին», – ասել է առողջապահության նախարարի պաշտոնակատարը։
Միաժամանակ, նա նշել է, որ առկա է պոլիկլինիկական հիմնարկներ դիմելիության մի փոքր աճ։
«Դա իրականում դրական է, որովհետև փաստացի մարդիկ սիմպտոնների դեպքում դիմում են պոլիկլինիկաներ, դա էլ նպաստում է, որ հիվանդանոցներում դիմելիությունն ու հոսպիտալիզացիան անկում է ապրում», – ասել է Թորոսյանը։
Նա նաև հայտարարել է, որ ԱՆ–ն` իր անձնակազմով և Հիվանդությունների կանխարգելման և վերահսկման ազգային կենտրոնն` իր անձնակազմով ամենօրյա, ամենժամյա ռեժիմով հետևում է իրավիճակին։
«Մենք ինքներս ենք այսօր ողջ օրն այցելել ենք Երևանի և մարզերի հիվանդանոցներ` տեղում ծանոթանալու իրավիճակին», – ասաց Թորոսյանը։
Նախարարի պաշտոնակատարը նշեց նաև, որ իրականացվում է դպրոցներում ջերմաստիճանի մոնիտորինգ։
«Որոշ դպրոցներում ջերմաստիճանային ռեժիմն այդքան էլ լավ չի պահպանվում։ Իհարկե, ունենք դրական դինամիկա։ Օրինակ հունվարի 8–ի դրությամբ մոտ 450 դպրոցում և 52 մանկապարտեզում ենք ունեցել ջերմաստիճանային ռեժիմի խախտում, հիմա ունենք ջերմաստիճանային ռեժիմի խախտում մոտ 200 դպրոցում և 21 մանկապարտեզում։ Այս ամեն ինչն իհարկե ասվում է տարածքային իշխանություններին», – ասաց Թորոսյանը։
Նա կրկին կոչ արեց պահպանել ջերմաստիճանային ռեժիմը` նշելով, որ դա այն հիմնական գործոնն է, որի դեպքում երեխաները վարակվում են։
Նա խոսեց նաև գրիպի շտամի մասին։
«Ինչպես գիտեք գրիպը վարակիչ վիրուսային հիվանդություն է։ Այս տարի շրջանառվում է ոչ միայն H1N1 շտամը, այլև այլ շտամեր, օրինակ H3N2 շտամը և B գրիպի շտամը։ Որպես այդպիսին մենք չունենք H1N1–ի կամ որևէ այլ շտամի համաճարակ։ Ունենք տարբեր շտամերի շրջանառություն», – ընդգծեց Թորոսյանը։
«Անդրադառնալով հիվանդանոցներում գրանցված մահացության դեպքերին` նախարարի պաշտոնակատարը նշեց, որ դրանք հիմնականում ծանր խրոնիկ հիվանդություններով պացիենտներ են, որոնց կողքից միանում է ինֆեկցիա», – ասաց առողջապահության նախարարի պաշտոնակատարը։
Վերջում նա ավելացրեց, որ եթե կարիք լինի բացի հսկողական գործողություններից և բուժական միջամտություններից հանրապետության մակարդակում ձեռնարկել այլ գործողություններ, առողջապահության ոլորտի պատասխանատուներն անպայման դա կանեն։
«Ցանկանում եմ բոլորիդ առողջություն», – եզրափակել է Թորոսյանը։–0–