«Սասնա ծռեր» խմբավորման անդամներից մեկին բաց են թողել` քաղաքից չհեռանալու ստորագրությամբ

ԵՐԵՎԱՆ, 4 օգոստոսի. /Նովոստի-Արմենիա/. Հուլիսի 17-ին Երևանի ՊՊԾ գնդի շենքը գրաված «Սասնա ծռեր» խմբավորման ավելի վաղ ձերբակալված անդամներից մեկը` Գևորգ Մելքոնյանը, բաց է թողնվել` քաղաքից չբացակայելու ստորագրությամբ, այդ մասին Facebook-ի իր էջում գրել է Թորոս Սէֆիլեանը (կալանավորված Ժիրայր Սեֆիլյանի եղբայրը):

Գևորգ Մելքոնյանը, խմբի մեկ այլ անդամ Ռուբեն Գրիգորյանի հետ, դուրս են բերվել ՊՊԾ գնդի գրաված շենքի տարածքից հուլիսի 31-ին: Այդ ժամանակ երիտասարդները պնդում էին, որ տեղյակ չէին շենքը գրավելու մտադրության մասին:

Նախօրեին «Սասնա ծռերի» բոլոր անդամներին առաջադրվել է նույն մեղադրանքը՝ ՀՀ ՔՕ 218-րդ հոդվածի 3-րդ մասի 1-ին կետով (պատանդ վերցնելը) և 235-րդ հոդվածի 3-րդ մասով (ապօրինի զենք զինամթերք ձեռք բերել, իրացնել, պահել, փոխադրել):

Ընդդիմադիր Ժիրայր Սեֆիլյանի զինված կողմնակիցները հուլիսի 17–ին մուտք են գործել ՊՊԾ գնդի տարածք։ Նրանք պահանջում էին ազատ արձակել Ժիրայր Սեֆիլյանին, ով կալանավորվել էր շուրջ մեկ ամիս առաջ մի խումբ անձանց կողմից զենք ապօրինի պահելու կասկածանքով։

Հուլիսի 31-ին զինված խումբը զենքը վայր է դրել և հանձնվել իշխանություններին: Այս ընթացքում զոհվել են ոստիկանության երկու աշխատակից: Զինված խմբի անդամների և իրավապահ մարմինների աշխատակիցների շրջանում եղել են վիրավորներ: -0-