«Ռոսիա 24» հեռուստաալիքը պատմել է Հայաստանի մասին (ՏԵՍԱՆՅՈՒԹ)

ԵՐԵՎԱՆ, 26 մարտի. /Նովոստի–Արմենիա/. «Ռոսիա 24» հեռուստաալիքը Անտոնի Բորիսովի ողջ ռեպորտաժը նվիրել է Հայաստանին, երկրի անցյալին, ներկային և ապագային։

Հեղինակները, դուրս գալով ուղեցույցի շրջանակներից, պատմել են այն մասին, թե ով է տնկում խաղողի վազը, ով է հոլիվուդյան աստղին գորգ նվիրում, ինչու է լեռներում գործում միջազգային դպրոց և ինչն է օգնում բիզնեսին հավատալ տնտեսական աճին։

Նկարահանող խումբն այցելել է փոքր և միջին ձեռնարկություններ, տուրիստական կենտրոններ, նորարարական ընկերություններ և ուսումնական հաստատություններ։

«Հարուստ մշակույթ ունեցող երկիր, որը ոչ մեկին անտարբեր չի թողնի...այստեղ կան հնադարյան եկեղեցիներ, միաժամանակ ՏՏ տեխնոլոգիաները բավականին զարգացած են։ Այստեղ գորգերն այնպես են գործում, ինչպես դա արել են դեռևս մեր թվարկությունից առաջ, միաժամանակ այստեղ կարելի է նորարարական կրթություն ստանալ։ Երկիրը պահպանում է ավանդույթներն ու ստեղծում նորերը», – նշել են ռեպորտաժի հեղինակները։–0–