ԵՐԵՎԱՆ, 9 դեկտեմբերի. /Նովոստի–Արմենիա/. «Լուսավոր Հայաստան» կուսակցության ղեկավար Էդմոն Մարուքյանն արտահերթ խորհրդարանական ընտրություններին քվեարկելուց հետո իր ուղերձն է հղել հայաստանցիներին։
«Այսօր կավարտվի պատերազմը հների և նորերի միջև, և ես կոչ եմ անում քաղաքացիներին ակտիվորեն գալ ընտրատեղամասեր և կատարել քաղաքացիական պարտքը։ Ամեն ինչ այսօր կավարտվի, և մինչև երեկոյան ժամը 8–ը քաղաքացիները դրան նպաստելու հնարավորություն ունեն»,– հայտարարեց Մարուքյանը։
Նա նաև դիմեց ոստիկանությանը` կոչ անելով անել հնարավոր ամեն ինչ ընտրությունների ընթացքում ստացվող և մտահոգություն առաջացնող բոլոր տեղեկությունները պարզելու և հրապարակելու համար։
Պատասխանելով լրագրողների հարցերին` Մարուքյանը նաև նշեց, որ այսօր քվեարկել է Հայաստանի ապագայի համար։
«Ես քվեարկել եմ Հայաստանի այն ապագայի համար, որն արդեն սկսվել է և այն ապագայի, որի մասին մենք խոսել ենք նախընտրական քարոզարշավի ընթացքում», – ընդգծեց Մարուքյանը։
Դեկտեմբերի 9-ին ժամը 8:00-ին, ՀՀ-ում բացվել են բոլոր 2010 ընտրատեղամասերը, և մեկնարկել խորհրդարանական արտահերթ ընտրությունները:
ԿԸՀ–ի տեղեկացմամբ, Հայաստանի ընտրողների ռեգիստրում ներառված է 2 մլն 592 հազար 486 մարդ, ձևավորվել է 2010 ընտրատեղամաս։
Ըստ ԿԸՀ–ի, ընտրություններին մասնակցելու հայտ են ներկայացրել 11 քաղաքական կուսակցություններ և դաշինքներ: Փաստաթղթեր են ներկայացրել «Իմ քայլը» դաշինքը, «Բարգավաճ Հայաստան» կուսակցությունը, «Ազգային առաջընթաց», «Քրիստոնեաժողովրդական վերածնունդ» կուսակցությունները, «Սասնա ծռեր» համահայկական կուսակցությունը, «Օրինաց երկիր» կուսակցությունը, «Մենք» կուսակցական դաշինքը, ՀՅԴ–ն, «Լուսավոր Հայաստան» կուսակցությունը, Հայաստանի հանրապետական կուսակցությունը, «Քաղաքացու որոշում» սոցիալ–դեմոկրատական կուսակցությունը։–0–