ԵՐԵՎԱՆ, 28 նոյեմբերի. /Նովոստի Արմենիա/. Գրոսմայստեր Լևոն Արոնյանի կինը` Արիանա Կաոիլին, մեկնաբանել է ՀՀ վարչապետ Կարեն Կարապետյանի խորհրդական դառնալու որոշումը։
Նոյեմբերի 21–ին Կաոիլին նշանակվել է ՀՀ վարչապետ Կարեն Կարապետյանի խորհրդական հասարակական հիմունքներով։ Կաոիլին, մասնավորապես, փորձագիտական խորհրդատվություն կտրամադրի օտարերկրյա ներդրումների ներգրավման և միջազգային ֆինանսական ու առևտրային կառույցների հետ համագործակցության հարցում։
Կաոիլին հենց սկզբից հայտարարեց, որ չի համարում իրեն ՀՀ կառավարության և քաղաքական համակարգի մաս, քանի որ դա իրեն հետաքրքիր չէ։
«Ինձ հետաքրքրում է Հայասանի տնտեսական զարգացումը։ Կփորձեմ հասկանալ, թե ինչ կարելի է անել այդ ուղղությամբ։ Եթե իմ փորձի, պրոֆեսիոնալիզմի շնորհիվ կարողանամ աջակցել Հայաստանի զարգացմանը` հարմարացնելով միջազգային փորձը, ապա կանեմ դա», – ասաց Կաոիլին։
Նա ևս մեկ անգամ խոստովանեց իր սերը Հայաստանի նկատմամբ և հույս հայտնեց, որ օգտակար կլինի երկրին։ Նա նաև գնահատեց տնտեսական վիճակը հանրապետությունում։
«Անկախության 25 տարվա ընթացքում ձեռք բերված առաջընթացը բավականին շոշափելի է։ Առաջին անգամ Հայաստան եմ այցելել 2007 թվականին, և այս տարիների ընթացքում գրանցված տարբերությունն ակնհայտ է։ Հայաստանի
տնտեսությունը հիմա ավելի զարգացած է։ Ես տեսնում եմ այդ փոփոխությունները և՛ որպես սպառող, և՛ որպես մասնագետ», – ասաց Կաոիլին։
Նա կոչ արեց Հայաստանի բնակիչներին զինվել համբերությամբ և խոստացավ, որ ճիշտ տնտեսական քաղաքանություն վարելու և երկարաժամկետ ռազմավարություն ընտրելու դեպքում մեկ–երկու տարի հետո տնտեսական վիճակը Հայաստանում կփոխվի։
Արիանա Կաոիլին կառավարման և բիզնես խորհրդատվության ոլորտի մասնագետ է։ Նա հայտնի է նաև որպես ավստրալացի շախմատիստուհի։ Ժամանակին նրան անվանում էին «Աննա Կուրնիկովա շախմատում»։ Կաոիլին աշխատել է ֆինանսների, կառավարման, գյուղատնտեսության և հանքաարդյունաբերության ոլորտներում։ Ավստրալիայի կառավարության կողմից իրականացվող մի շարք ծրագրերում ներգրավված է եղել որպես հորհրդատու, ինչպես նաև ներառված է եղել Ասիական-Խաղաղօվկիանոսյան տնտեսական համագործակցության կազմակերպության (Asia Pacific Economic Cooperation (APEC) խորհրդատվական խմբում։ –0–
Ծանոթացեք լուրերին առաջինն ու քննարկեք դրանք մեր Telegram-յան ալիքում