ԵՐԵՎԱՆ, 10 մայիսի. /Նովոստի–Արմենիա/. «Պանամական օֆշորների» հետ առնչություն ունեցող պաշտոնյաները կպատժվեն, եթե «փողերի լվացման» փաստն ապացուցվի, երեքշաբթի լրագրողներին հայտարարեց ՀՀ ԱԺ փոխխոսնակ Էդուարդ Շարմազանովը։
«Պանամական օֆշորների» թարմացված ցուցակում, որը հրապարակվել է offshoreleaks.icij.org կայքում, հայտնվել է Հայաստանի հետ կապված 37 ֆիզիկական և իրավաբանական անձ։
«Եթե ցուցակում նշված մարդիկ այս կամ այն կերպ կապված լինեն այս կամ այն պետական պաշտոնյանի հետ կամ պարզվի, որ նրանք կապ ունեն «կեղտոտ» գործարքների հետ և իրականացրել են ապօրինի գործառնություններ, անօրինական կերպով երկրից դուրս են հանել ֆինանսական միջոցներ, ապա նրանք կկրեն իրենց պատիժը», – ասաց Շարմազանովը։
Նա նաև նշեց, որ ծանոթացել է ցուցակում ներառված անունների հիմնական մասին, սակայն այդ անուններն իրեն անծանոթ են։
«Այս պահին որևէ բան չեմ կարող ասել, քանի որ իրականացվում է ուսումնասիրություն։ Մենք չգիտենք` ցուցակում կա՞ն, արդյոք, այլ պետական ծառայողների անուններ, բացի Միհրան Պողոսյանից (ԴԱՀԿ ծառայության նախկին պետ, խմբագրություն)։ Ուսումնասիրությունները ցույց կտան, թե ինչ կլինի հետագայում», – ասաց Շարմազանովը։
ԴԱՀԿ նախկին պետի նկատմամբ քրեական գործ է հարուցվել>>
Նա նաև հիշեցրեց անմեղության կանխավարկածի մասին` ընդգծելով, որ չարժե որևէ գնահատական տալ, քանի դեռ Միհրան Պողոսյանի և մնացածների մեղքն ապացուցված չէ դատական կարգով։
«Անկախ նրանից, թե ում անուններն են նշվում, ես կոչ եմ անում հարգել այս կարևորագույն իրավաբանական դրույթը», – ասաց Շարմազանովը։
Փոխխոսնակը նաև վստահեցրեց, որ մեղքն ապացուցելու դեպքում կպատժվեն բոլորը, ովքեր խախտել են օրենքն ու ներգրավված են կոռուպցիոն սկանդալներում։
Հետաքննող լրագրողների միջազգային կոնսորցիումի հրապարակած փաստաթղթերում կան նաև ընկերություններ, որոնք պատկանում են Հայաստանի ԴԱՀԿ ծառայության պետին։ Լրագրողական հետաքննություններով զբաղվող Hetq.am հայկական կայքի տվյալներով, Պողոսյանը Պանամայում գրանցված երեք ընկերությունների` «Sigtem Real Estates Incorporated»–ի, «Hopkinten Trading Incorporated»–ի և «BANGIO INVEST S.A.»–ի բաժնետեր է։ –0–
