ԵՐԵՎԱՆ, 6 մարտի. /Նովոստի–Արմենիա/. ՀՀ կառավարությունը երեքշաբթի նիստի ժամանակ հավանություն է տվել «Դեղատոմսերի ձևի, դեղատոմսերի դուրսգրման կարգի, դեղերի բացթողնման մասին, ինչպես նաև դեղորայքի և դեղամիջոցների հաշվառման կարգի մասին» որոշման մեջ փոփոխություններ կատարելու մասին նախագծին։
Ինչպես նիստի ընթացքում նշեց ՀՀ առողջապահության փոխնախարար Սամվել Մարգարյանը, խոսքը մարտի 1–ից ուժի մեջ մտած որոշման մասին է, ըստ որի` չի կարելի ազատ ձեռք բերել այն դեղամիջոցները, որոնք արտադրողի կողմից նշված են որպես դեղատոմսով բացթողնվող։
Загружается новость ... "Лево"
«Վերլուծելով ստեղծված իրավիճակը` մենք առաջարկում ենք որոշումն ուժի մեջ մտցնել փուլային` աստիճանական անցման ժամանակացույցով, որի հիմքում դրված է դեղերի ռիսկերի աստիճանը։ Առավել ռիսկային հոգեմետ դեղերն ու հակաբիոտիկները բաց կթողնվեն դեղատոմսով մարտի 1–ից։ Հաջորդ փուլում պարտադիր պահանջը կտարածվի նաև ներարկումային դեղերի վրա, իսկ արդեն հոկտեմբերի 1–ից այդ պահանջները կտարածվեն դեղորայքի բոլոր ցուցակների վրա», – ասաց նա։
Ինչպես «Նովոստի–Արմենիա» գործակալությանը պարզաբանեցին ՀՀ առողջապահության նախարարության մամուլի ծառայությունից, գերատեսչությունն ավելի վաղ հայտարարում էր, որ փուլ առ փուլ անցում կկատարի դեղատոմսով դեղերի բացթողնման կարգին։
Загружается новость ...
"Право"
«Դա նույն որոշումն է, որը հիմա ձեռք է բերել իրավական հիմաքեր։ Կա մեկ տարբերություն, որ մարտի 1–ից դեղատոմսով պետք է բաց թողնվեին նաև հորմոնալ դեղերը, որոնք ազատ վաճառքից դուրս կգան հոկտեմբերի 1–ից», – պարզաբանեց ՀՀ առողջապահության նախարարի մամուլի քարտուղար Անահիտ Հայթայանը։
Նրա խոսքով, կառավարության նախորդ որոշման մեջ չէր նշվում է, որ այն պետք է ուժի մեջ մտնի փուլ առ փուլ։
«Դեղորայքի բացթողնման աստիճանական կարգը չէր ներառվել կառավարության սկզբնական որոշման մեջ տեխնիկական պատճառներով», – ավելացրեց Հայթայանը։
Նախագծի նպատակն է դեղատոմսային դեղերի դուրս գրման և դեղատնից դրանց բաց թողնելու կարգի աստիճանական ներդրման արդյունքում ապահովել ավելի մեղմ անցում դեպի նոր կարգավորիչ դաշտ: Ըստ հիմնավորման, որոշումն ընդունելուց հետո բնակչության և առողջապահության ոլորտի մասնագետների շրջանում ՀՀ առողջապահության նախարարության կողմից ձեռնարկված իրազեկման արշավների ընթացքում պարզ է դարձել, որ միաժամանակ բոլոր դեղատոմսային դեղերի համար որոշման կիրառումը կառաջացնի որոշակի բարդություններ ինչպես բնակիչների, այնպես էլ բժիշկների և դեղատների աշխատակիցների համար: Ուստի մշակվել է աստիճանական անցման ժամանակացույց՝ հիմք ընդունելով առանձին դեղախմբերի ռիսկայնության աստիճանը: Նախագծի ընդունմամբ ակնկալվում է նվազեցնել նոր կարգավորումների արդյունքում բնակչության հնարավոր անհարմարությունները և բժիշկների ծանրաբեռնվածությունը:–0–
