Հայաստանի ներկայացուցիչները Մոսկվայում քննարկել են ճգնաժամի սահմանադրական լուծումը. Պեսկով
ԵՐԵՎԱՆ, 27 ապրիլի. /Նովոստի Արմենիա/. Մոսկվա այցելած Հայաստանի ներկայացուցիչների բանակցությունների հիմնական թեման այդ երկրում առկա ճգնաժամի շուտափույթ սահմանադրական կարգավորումն է, լրագրողների հետ զրույցում հայտարարել է ՌԴ նախագահի մամուլի խոսնակ Դմիտրի Պեսկովը, հաղորդում է ՏԱՍՍ–ը:
«Բանակցություններն ընթացել են գերատեսչությունների գծով, եղել է նաև հեռախոսազրույց (ՌԴ նախագահ Վլադիմիր Պուտինի ու ՀՀ վարչապետի պաշտոնակատար Կարեն Կարապետյանի միջև): Այդ բանակցությունները, հիմնականում, կենտրոնացած էին Հայաստանում ստեղծված ճգնաժամային իրավիճակի շուտափույթ կարգավորման անհրաժեշտության շուրջ, ինչն անկասկած պետք է տեղի ունենա Սահմանադրության շրջանակներում, ու այնպես, որպեսզի շահագրգիռ բոլոր կողմերի միջև կոնսենսուս լինի», - ասել է Կրեմլի ներկայացուցիչը:
Ըստ նրա, հիմա Ռուսաստանում հետևում են վարչապետի ընտրություններին, որոնք պետք է տեղի ունենան Հայաստանի խորհրդարանում մայիսի 1-ին:
«Ես չունեմ որևէ տեղեկություն, չեմ կարող պատասխանել ձեզ», - ասել է Պեսկովը, երբ նրան հարցրել են, թե ռուսաստանցի բարձրաստիճան պաշտոնյաներից ո՞վ է այցելել Հայաստան ապրիլի 25-ին, ինչի մասին հայտնում էին հայկական ԶԼՄ-ները:
Ինչպես հինգշաբթի հայտնել է Կրեմլի մամուլի ծառայությունը, Պուտինն ու Կարապետյանը հեռախոսազրույցում կարևորել են մայիսի 1-ի կայանալիք վարչապետի ընտրությունները: Զրուցակիցները նշել են, «որ Հայաստանում ճգնաժամային իրավիճակի կարգավորումը պետք է կայանա բացառապես իրավական դաշտում, գործող Սահմանադրության շրջանակում ու լեգիտիմ խորհրդարանական ընտրությունների արդյունքների հիման վրա, որոնք անցկացվել են 2017 թ.-ի ապրիլին»:
Չորեքշաբթի Պուտինը հեռախոսազրույց է ունեցել Հայաստանի նախագահ Արմեն Սարգսյանի հետ: Ինչպես հայտնել է Կրեմլը, զրուցակիցները քննարկել են Հայաստանի ներքաղաքական իրավիճակը: Արմեն Սարգսյանն ու Վլադիմիր Պուտինը նշել են, որ ներքին ճգնաժամը շուտափույթ հաղթահարելու համար Հայաստանի քաղաքական ուժերը պետք է ցուցաբերեն զսպվածություն ու պատասխանատվություն, նրանք պետք է պատրաստ լինեն լուծել առկա խնդիրները կառուցողական երկխոսության միջոցով` Սահմանադրության շրջանակում։
Հայաստանում ապրիլի 13–ից մեկնարկած մասշտաբային բողոքի ակցիաների ֆոնին ապրիլի 23–ին ՀՀ վարչապետ Սերժ Սարգսյանը հրաժարական տվեց։ Նույն օրը ՀՀ նախագահ Արմեն Սարգսյանն ընդունեց կառավարության հրաժարականը։ Ապրիլի 25-ին կայացած հանրահավաքին Նիկոլ Փաշինյանն առաջադրվել է որպես վարչապետի թեկնածու: Վարչապետի ընտրությունները կկայանան մայիսի 1-ին Ազգային ժողովում:–0–
