Հայաստանի առողջապահության նախարարը չի պատրաստվում հրաժարական տալ
![Հայաստանի առողջապահության նախարարը չի պատրաստվում հրաժարական տալ Հայաստանի առողջապահության նախարարը չի պատրաստվում հրաժարական տալ](/upload/iblock/13e/v6x8ipepv7bsukmkljahgwhk8l4hfp2u.jpg)
ԵՐԵՎԱՆ, 24 մարտի. /Նովոստի–Արմենիա/. Հայաստանի առողջապահության նախարար Արմեն Մուրադյանը հինգշաբթի լրագրողներին հայտնել է, որ չի պատրաստվում հրաժարական տալ:
Ինչպես նշեց նախարարը, իրականում թյուրիմացություն է տեղի ունեցել, երբ Առողջապահության համաշխարհային կազմակերպությունն իրեն հրավեր է ուղարկել` առաջարկելով զբաղեցնել նախագահի տեղակալի պաշտոնը` ԱՀԿ 69-րդ Վեհաժողովում, որն անցկացվելու է մայիսի 23-ից 28-ը Ժնևում:
«Առաջին անգամ ձեզնից եմ (ԶԼՆ-ներից) լսում, որ ինձ ազատելու են պաշտոնից: Չգիտեմ կուրախացնեմ ձեզ, թե կտխրեցնեմ, բայց խոսքը միայն Վեհաժողովի 7 օրերի մասին է», - ասաց Մուրադյանը:
Առողջապահության նախարարը ազատվելու է զբաղեցրած պաշտոնից>>
Նախարարը չի մեկնաբանել ԼՂՀ առողջապահության նախարար Հարություն Քուշքյանի (Հայաստանի առողջապահության նախկին նախարարի) հրաժարականը ով, ըստ շրջանառվող լուրերի, պատրաստվում է կրկին Հայաստանում նախարարական պորտֆել ստանալ:
«Ես չեմ կարող մեկնաբանել Հարություն Քուշքյանի հրաժարականի հարցը, քանի որ առաջին անգամ եմ լսում այդ մասին» - ասաց Մուրասյանը: -0-