Հայ դպրոցականների մաթեմատիկայի թիմը Հոնկոնգի միջազգային օլիմպիադայում նվաճել է արծաթե և բրոնզե մեդալներ

ԵՐԵՎԱՆ, 15 հուլիսի. /Նովոստի-Արմենիա/. Հայաստանի դպրոցականների մաթեմատիկայի թիմն արժանացել է հինգ՝ մեկ արծաթե և չորս բրոնզե մեդալների, հաղորդում է ՀՀ կրթության և գիտության նախարարության մամուլի ծառայությունը:

Հաղորդագրության համաձայն, հուլիսի 9-ին Չինաստանի Հոնկոնգ քաղաքում մեկնարկած դպրոցականների առարկայական միջազգային օլիմպիադաներին Հայաստանի դպրոցականների մաթեմատիկայի թիմն արժանացել է հինգ՝ մեկ արծաթե և չորս բրոնզե մեդալների:

«Արծաթե մեդալի է արժանացել Երևանի Ա.Շահինյանի անվան ֆիզմաթ հատուկ դպրոցի սան Միքայել Մկրտչյանը, բրոնզե մեդալի՝ նույն դպրոցի սաներ Նարեկ Խանդանյանը, Սերգեյ Ներսիսյանը, Վահան Մարտիրոսյանը և «Ֆոտոն» վարժարանի աշակերտ Արսեն Համբարձումյանը», - նշվում է հաղորդագրության մեջ:

ՀՀ դպրոցականների առարկայական միջազգային օլիմպիադայի հավաքականը ղեկավարել են ՀՀ ԳԱԱ մաթեմատիկայի ինստիտուտի ավագ գիտաշխատող Սմբատ Գոգյանը և Ա.Շահինյանի անվան Ֆիզմաթ հատուկ դպրոցի մաթեմատիկայի ուսուցիչ Տիգրան Մարգարյանը: Գերատեսչության հաղորդմամբ, Վրաստանի և Ադրբեջանի թիմերը ստացել են մեկական բրոնզե մեդալներ: -0-