ՀՀ մշակույթի նախարարի պաշտոնակատարը չի վիրավորվել նոր վարչապետից

ԵՐԵՎԱՆ, 16 սեպտեմբերի. /Նովոստի-Արմենիա/. ՀՀ մշակույթի նախարարի պաշտոնակատար Հասմիկ Պողոսյանը չի վիրավորվել նորանշանակ վարչապետ Կարեն Կարապետյանից:

Նախօրեին հայկական կառավարության ղեկավարն անցկացրել է իր առաջին կառավարական նիստը, որի ընթացքում խնդրել է Պողոսյանին կառավարական որոշման նախագիծը ներկայացնելիս ավելի լակոնիկ լինել:

«Վարչապետը կարող է ինչպես հարցեր տալ, այնպես էլ` նկատողություններ անել: Դա բնական է: Յուրաքանչյուր մարդ, երբ նոր գործունեություն է սկսում, բարձրաձայնում է իր մոտեցումները և դիրքորոշումները», - ուրբաթ լրագրողներին ասաց Պողոսյանը:

Ընդ որում, նա խուսափեց պատասխանել այն հարցին` արդյոք տեսնում է իրեն կառավարության նոր կազմում:

«Եկե՛ք ավելի շատ մշակույթով զբաղվենք: Ինձ կարող եք մշակույթի ոլորտին առնչվող ցանկացած հարց ուղղել», - ասաց Պողոսյանը:

Նախօրեին ԱԺ փոխխոսնակ Էդուարդ Շարմազանովը հայտարարել է, որ Հայաստանի նոր կառավարությունում նշանակալի փոփոխություններ են սպասվում: -0-