ԵՐԵՎԱՆ, 2 հոկտեմբերի. /Նովոստի–Արմենիա/. ՀՀ ԱԺ–ն երեքշաբթի արտահերթ նիստում ընդունեց «Ազգային ժողովի կանոնակարգի մասին» օրենքում նախատեսված փոփոխությունները, որոնք թույլ կտան պատգամավորներին ապահովագրվել խորհրդարանի հնարավոր արձակումից։
Ըստ փոփոխությունների, եթե ԱԺ նիստը չի կարող անցկացվել քվորումի բացակայության պատճառով կամ ստեղծվում են խոչընդոտներ նիստին պատգամավորների մասնակցության համար, ապա առաջարկվում է դադարեցնել նիստն ու շարունակել խոչընդոտող հանգամանքների վերացումից հետո։
Ինչպես կարծում են օրենքի հակառակորդները, այդ կերպ ՀՀԿ–ն և օրինագծին աջակցող քաղաքական ուժերը փորձում են ապահովագրվել խորհրդարանի հնարավոր արձակումից և ԱԺ արտահերթ ընտրությունների անցկացումից։ Խնդիրն այն է, որ ըստ ԱԺ կանոնակարգի, եթե պատգամավորները երկու անգամ չքվեարկեն վարչապետի թեկնածուի օգտին, ապա ԱԺ–ն արձակվում է օրենքի ուժով։
Պատգամավորները մասնակցել են քվեարկությանը տեխնիկական հնարավորությունների բացակայության դեպքում։ «Ելք» դաշինքի պատգամավոր Լենա Նազարյանն արտահերթ նիստից առաջ հավաքել էր պատգամավորների քարտերը, որոնցով նրանք միանում են քվեարկության էլեկտրոնային համակարգին։ Միաժամանակ, խորհրդարանը չապահովեց ուղիղ եթեր և ձայն ԱԺ նիստերի դահլիճից։
Օրինագծին երեք խմբակցություններից կողմ քվեարկեց 67 պատգամավոր, դեմ էր միայն «Ելք» խմբակցությունը։
Ինչպես նշեց ԱԺ խոսնակ Արա Բաբլոյանը, այս որոշումն ընդունվել է ոչ թե այն պատճառով, որ խորհրդարանական ուժերը հրաժարվում են ԱԺ արտահերթ ընտրություններից։
«Հարցն ընդունվեց ոչ թե այն պատճառով, որ մենք չենք ցանկանում գնալ արտահերթ ընտրությունների, այլ այն պատճառով, որ մենք թույլ չենք տալիս, որպեսզի ճնշում գործադրվի պատգամավորների վրա», – ասաց Բաբլոյանը։
ՀՀ վարչապետ Նիկոլ Փաշինյանը տեղեկացրեց, որ քիչ անց ելույթ կունենա Բաղրամյանի պողոտայում գտնվող ԳԱԱ–ի շենքին հարակից հրապարակում։ Քաղաքացիներն այս րոպեներին հավաքվում են ԱԺ շենքի մոտ։–0–