ԵՐԵՎԱՆ, 14 հոկտեմբերի. /Նովոստի-Արմենիա/. ՀԱՊԿ անդամ-երկրների նախագահները ժամանել են ՀՀ նախագահ Սերժ Սարգսյանի նստավայր` ՀԱՊԿ Հավաքական անվտանգության խորհրդի նստաշրջանին մասնակցելու համար:
Նիստին կմասնակցեն ՀԱՊԿ երկրների բոլոր նախագահները, բացի Ղազախստանից: Ղազախստանի նախագահ Նուրսուլթան Նազարբաևի առողջության հետ կապված խնդիրների պատճառով Ղազախստանի պատվիրակությունը գլխավորում է վարչապետ Բակիտժան Սագինտաևը:
Գագաթնաժողովից առաջ կկայանա ԱԳ նախարարների խորհրդի, Պաշտպանության նախարարների խորհրդի և Անվտանգության խորհուրդների քարտուղարների կոմիտեի համատեղ նիստը, որի ժամանակ կքննարկվեն ՀԱԽ-ի նիստին ներկայացված փաստաթղթերը։
Ինչպես հայտնեցին կազմակերպության մամուլի ծառայությունից, ՀԱՊԿ երկրների նախագահները կքննարկեն միջազգային իրավիճակը և հավաքական անվտանգության ապահովմանը վերաբերող ակտուալ հարցեր, կդիտարկեն մինչև 2025 թ. Հավաքական անվտանգության ռազմավարության մասին որոշման նախագծերը ՀԱՊԿ Ճգնաժամային արձագանքման կենտրոնի ստեղծմանը վերաբերող նախագծերը, ՀԱՊԿ գործունեության կատարելագործման հետ կապված ՀԱԽ-ի որոշումների իրականացումը և ահաբեկչության հակազդման հետ կապված լրացուցիչ միջոցները, մասնավորապես, ՀԱՊԿ-ի շրջանակում ահաբեկչական ճանաչված կազմակերպությունների Միասնական ցանկի ձևավորման մասին դրույթի նախագիծը:
ՀԱՊԿ պետությունների նախագահների գագաթնաժողովի առանցքային հարցերից մեկը կլինի կազմակերպության նոր գլխավոր քարտուղարի ընտրությունը: Սպասվում է, որ պաշտոնը երեք տարով կստանձնի Հայաստանի ներկայացուցիչը:
ՀԱԽ-ի նստաշրջանի ընթացքում մազմակերպության նախագահությունը կանցնի Հայաստանից Բելառուսին: Հայկական կողմը նախագահում է ՀԱՊԿ-ում 2015 թ.-ի դեկտեմբերից: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում