ԵՐԵՎԱՆ, 17 հունիսի. /Նովոստի-Արմենիա/. Հայաստանի Հանրապետությունում Ռուսաստանի ԱԴԾ-ի Սահմանապահ վարչության աշխատակիցները ձերբակալել են Անգոլայի քաղաքացու, որն անօրինական հատել է հայ-թուրքական սահմանը, հաղորդում է Սահմանապահ վարչության մամուլի ծառայությունը:
Հաղորդագրության համաձայն, սույն թվականի հունիսի 15-ին իրավախախտը, լողալով, հատել է սահմանին գտնվող Արաքս գետը, ապա, օգտագործելով հատուկ գիտելիքներ, անցել է ազդանշանային համալիրի միջով և մի քանի տասնյակ մետր շարժվել սահմանի երկայնքով` փորձելով թաքցնել հետքերը:
Որոշ ժամանակ անց օրինախախտը փորձել է ավելի խորը ներթափանցել Հայաստանի տարածք:
Տեղի բնակիչները, լինելով ժողովրդական կամավոր ջոկատի անդամներ (ԺԿՋ), նկատել են անծանոթին և օպերատիվորեն հաղորդել սահմանապահներին։
Այդպես, ԺԿՋ անդամների ներդաշնակ գործողությունների արդյունքում, Երվանդաշատ բնակավայրի շրջանում անհայտ անձը ձերբակալվել և փոխանցվել է ռուս սահմանապահներին:
«Հարցաքննության ժամանակ ձերբակալվածը պարզաբանել է, որ Անգոլայի քաղաքացի է, ծնվել է 1982 թ.-ին և մտադիր էր Հայաստանի տարածքով հասնել Անգոլա (Աֆրիկա մայրցամաք)», - նշվում է հաղորդագրության մեջ:
Զննության արդյունքում ձերբակալվածի մոտ հայտնաբերվել է ուսապարկ, որում նրա անձնական իրերն էին, Ֆրանսիայում փախստականի կարգավիճակը հաստատող փաստաթուղթ ու Samsung ապրանքանիշի բջջային հեռախոս:
Միջադեպի բոլոր հանգամանքները պարզելու նպատակով իրավախախտը մանրամասն ցույց է տվել բոլոր տեղանքները և այն, թե ինչպես է հաղթահարել ինժեներական արգելքները:
Նույն օրը իրավախախտը, հաստատված կարգով, փոխանցվել է ՀՀ կառավարությանն առընթեր ԱԱԾ-ի աշխատակիցներին, որոնք կստուգեն ձերբակալված քաղաքացու վարկածը:
«ՀՀ-ում ՌԴ ԱԴԾ-ի Սահմանապահ վարչությունն իր երախտիքն է հայտնում Երվանդաշատ բնակավայրի բնակիչներին, որոնք մասնակցել են իրավախախտի ձերբակալման գործողություններին, զգոն են և ակտիվ աջակցում են ՀՀ պետական սահմանի պաշտպանությանը», - նշվում է հաղորդագրության մեջ: -0-
