ԱՄՆ Սենատը հաստատել է ՀՀ–ում ԱՄՆ նոր դեսպանի թեկնածուին (ՖՈՏՈ)

12:31

04 Հունվարի 2019

ԵՐԵՎԱՆ, 4 հունվարի./Նովոստի–Արմենիա/. ԱՄՆ Սենատը հունվարի 2–ի նիստում հաստատել է Լին Թրեյսիի թեկնածությունը ՀՀ–ում ԱՄՆ արտակարգ և լիազոր դեսպանի պաշտոնում, հաղորդում է Ամերիկայի հայ ազգային կոմիտեն (ANCA)։

Բացի այդ, նույն նիստի ժամանակ հաստատվել է Ադրբեջանում ամերիկյան դիվանագիտության նոր ղեկավարի` Էրլ Լիտցենբերգերի թեկնածությունը։

ANCA–ից նշել են, որ քվեարկությունից առաջ ԱՄՆ Սենատի միջազգային հարաբերությունների կոմիտեն մանրամասն ուսումնասիրել է ԱՄՆ–ի վարած քաղաքականությունն այնպիսի հարցերում, ինչպիսիք են Հայոց ցեղասպանությունը, տարածաշրջանային ագրեսիան, ներքին ճնշումներն Ադրբեջանում և այլ առանցքային հարցեր։

Линн Трейси

«Հայաստանում խաղաղ իշխանափոխությունից մոտ մեկ տարի անց Ամերիկայի հայ ազգային կոմիտեն հույս ունի համագործակցել դեսպան Թրեյսիի հետ` ԱՄՆ–ի և Հայաստանի միջև ռազմավարական հարաբերությունները բարելավելու նպատակով», – հայտարարել է ANCA–ի գործադիր տնօրեն Արամ Համբարյանը։

Նա նաև հույս է հայտնել, որ Բաքվում ԱՄՆ նոր դեսպան Լիտցենբերգերը վճռականորեն կդիմակայի Ադրբեջանի նախագահ Իլհամ Ալիևի վարած հակահայկական քաղաքականությանը։

Լին Թրեյսին Ռուսաստանի և նախկին ԽՍՀՄ երկրների գծով մասնագետ է։ Նա պրոֆեսիոնալ դիվանագետ է, այժմ զբաղեցնում է Պետդեպարտամենտում Ռուսաստանի հարցերով ավագ խորհրդականի պաշտոնը։ Մինչ այդ աշխատել է Մոսկվայում, Աշխաբադում և Աստանայում ԱՄՆ դեսպանի տեղակալ, եղել է պետքարտուղարի` Կենտրոնական Ասիայի հարցերով օգնականի առաջին տեղակալը։ Թրեյսին նաև աշխատել է Պակիստանում ԱՄՆ հյուպատոսությունում։

Լին Թրեյսին պետքարտուղարի կողմից արժանացել է «Հերոսության համար» մրցանակին։ Տիրապետում է ռուսերեն լեզվին։–0–

Ծանոթացեք լուրերին առաջինն ու քննարկեք դրանք մեր Telegram-յան ալիքում

#Հայաստան #ԱՄՆ #նոր դեսպան #Սենատ #Լին Թրեյսի

Թեմատիկ նյութեր