ԵՐԵՎԱՆ, 5 հոկտեմբերի./Նովոստի–Արմենիա/. ՀՀ ԱԺ փոխխոսնակ Արփինե Հովհաննիսյանը Facebook–յան իր էջում գրառում է կատարել` նշելով, որ այսօր հաղորդում է ներկայացրել ոստիկանություն։
«Այսօր ես հանցագործություն վերաբերյալ հաղորդում եմ ներկայացրել ՀՀ Ոստիկանություն։ Պատճառը իմ և իմ ընտանիքի անդամների կյանքի դեմ պարբերաբար ուղղված սպառնալիքներն են», – նշվում է Հովհաննիսյանը գրառման մեջ։
ԱԺ փոխխոսնակը նաև հայտնում է, որ այսուհետ հետևողական է լինելու, որպեսզի քաղաքացիաիրավական պատասխանատվության միջոցներ կիրառվեն իր վերաբերյալ վիրավորական (հայհոյախառն)գրառումներ և մեկնաբանություններ կատարող և տարածող անձանց նկատմամբ։
Загружается новость ... "Лево"
«Զանգվածային լրատվության միջոցների ներկայացուցիչները այս գրառումը կարող են դիտարկել որպես իրենց բոլոր հարթակներից, այդ թվում՝ ֆեյսբուքյան էջերից իմ վերաբերյալ վիրավորական(հայհոյախառն) գրառումների հեռացման առաջնային ծանուցում։ Ես դիմելու եմ դատարան յուրաքանչյուր մեկնաբանության եւ գրառման համար՝ հայցեր ներկայացնելով ներառյալ այն սուբյեկտների դեմ, ովքեր չեն հեռացրել կամ շարունակել են հարթակ տրամադրել վիրավորական(հայհոյախառն) գրառումների համար նույնիսկ ծանուցումից հետո։ Ես պատրաստվում եմ օգտվել իմ իրավունքների պաշտպանության ողջ իրավական գործիքակազմից՝ ընդհուպ մինչեւ դիմելով Մարդու իրավունքների Եվրոպական դատարան», – նշել է Արփինե Հովհաննիսյանն` ավելացնելով, որ լինելով քաջատեղյակ միջազգային չափանիշներին, սկզբունքներին, նախադեպերին՝ նա յուրաքանչյուր անգամ պատշաճ ծանուցելու է հայհոյանքների համար հարթակ տրամադրած և հարթակ դարձած լրատվամիջոցներին և անձանց, թեև հայկական օրենսդրությամբ և ՄԻԵԴ նախադեպերով վիրավորական մեկնաբանությունների հեռացման համար նախապես ծանուցելու պարտականություն սահմանված չէ։
«Սրանով լրատվամիջոցները հնարավորություն կունենան ողջամիտ ժամկետներում հեռացնել նման մեկնաբանությունները, որպեսզի որեւէ կերպ չխոչընդոտվի նրանց գործունեությունը եւ որեւէ կերպ չխաթարվի խոսքի ազատությունը։ Ինձ համար խոսքի ազատությունը եղել է եւ միշտ լինելու է բարձրագույն արժեք, սակայն մի բան պետք է հստակ լինի բոլորի համար՝ հայհոյանքը չի կարող անպատիժ մնալ», – եզրափակել է ԱԺ փոխխոսնակը։
Հոկտեմբերի 2–ին ԱԺ–ի արձակումը թույլ չտվող օրինագծի ընդունումից հետո հասարակության շրջանում ավելացան դժգոհությունն օրինագծին կողմ քվեարկած պատգամավորների նկատմամբ, որոնց թվում է նաև Արփինե Հովհաննիսյանը։
Անգամ ՀՀ վարչապետ Նիկոլ Փաշինյանը ԱԺ–ի շենքից Facebook–յան ուղիղ եթերում հորդորեց ԱԺ–ի դիմաց հավաքված մարդկանց հարգալից վերաբերմունք ցուցաբերել պատգամավորների նկատմամբ։–0–