ԵՐԵՎԱՆ, 5 հոկտեմբերի./Նովոստի–Արմենիա/. ԱԱԽ քարտուղար Արմեն Գրիգորյանը Facebook–յան էջում կատարած գրառման մեջ շնորհակալություն է հայտնել իրեն զորակցողներին ու պարզաբանել հոր ինքնասպանության հնարավոր պատճառները։
Նախօրեին հայտնի էր դարձել, որ ՀՀ ԱԱԽ քարտուղար Արմեն Գրիգորյանի հայրը` Վալերի Գրիգորյանը, ինքնասպանություն է գործել, նրա դին հայտնաբերել է նրա զարմիկ Մհեր Գրիգորյանը։
«Սիրելի ընկերներ, հարազատներ, հարգելի քաղաքացիներ, անչափ զգացված եմ այս ծանր պահին կողքիս լինելու և ձեր խոսքերով զորակցելու համար։ Ուզում եմ նշել, որ հայրս՝ Վալերի Մուշեղի Գրիգորյանը, կյանքի վերջին մեկ տարում ունեցել է ալցհայմերի հիվանդություն, ինչն էլ իր ազդեցությունն է ունեցել կյանքից հեռանալու նրա որոշման վրա։ Երբ առաջին անգամ լսեցի, թե ինչպես է մահացել հայրս, սկսեցի մտովի կռվել նրա հետ, բայց հետո հասկացա, որ դա իր որոշումն է, և ես հարգում եմ այդ որոշումը։ Այս հարցում իմ ընկալման ելակետն ազատությունն է, որը ամենակարևոր բանն է, որ մարդը կարող է ունենալ: Ես ընդունում եմ իր այդ որոշումը որպես իր կամքն ազատ արտահայտելու միջոց: Ավելին, համոզված եմ, որ սիրո արտահայտման ամենաբարձր ձևը սիրելի մարդուն իր նախընտրած կերպ լինելու ազատություն տալն է, ինչպես նաև ընդունել սիրած մարդուն այնպիսին, ինչպիսին ինքն է նախընտրում լինել», – նշել է Գրիգորյանը` հավելելով, որ իր համար մահը երբեք չի եղել ողբալու կամ սգալու առիթ։
«Այն հնարավորություն է արժևորելու մարդու ապրած կյանքը և այն ամենը, ինչ կարողացել է ստեղծել և փոխանցել մարդն իր կյանքի ընթացքում։ Հայրս իր երեխաների մեջ սերմանել է այնպիսի արժեքներ, ինչպիսիք են սկզբունքայնությունը, անարդարության նկատմամբ անհանդուրժողականությունը, ցանկացած իրավիճակում մարդ մնալու կարելիությունը։ Նրա ցույց տված օրինակների շնորհիվ ես սովորել եմ, որ կյանքն անընդհատ կանգնելու և պայքարելու հնարավորություն է», – նշել է ԱԱԽ քարտուղարը։
Նա ևս մեկ անգամ շնորհակալություն է հայտնել բոլոր այն մարդկանց, ովքեր այս կամ այն կերպ զորակցել և փորձել են կիսել ու թեթևացնել իր և իր ընտանիքի վիշտը։–0–
