ԵՐԵՎԱՆ, 31 մայիսի. /Նովոստի-Արմենիա/. Առաջին անգամ էքստրեմալ-մարզիկները «Base Fest» բեյսջամփինգի փառատոնի շրջանակում կցատկեն «ՏաԹևեր» ճոպանուղու խցիկներից` 320 մետր բարձրությունից, «Նովոստի-Արմենիա» գործակալությանը հայտնեցին միջոցառման կազմակերպիչները:
Բեյսջամփինգը էքստրեմալ մարզաձև է, որում օգտագործվում է հատուկ պարաշյուտ` ֆիքսված օբյեկտներից ցատկելու համար:
Հայաստանում առաջին «Base Fest» փառատոնը, որը տեղի կունենա հունիսի 5-ին, կհամախմբի աշխարհի տարբեր երկրների լավագույն մարզիկներին: Փառատոնի հարթակը «ՏաԹևեր» ռեվերսային ճոպանուղին է, որը ներառված է Գինեսի ռեկորդների գրքում` որպես աշխարհում ամենաերկար ռեվերսային ճոպանուղի։
Փառատոնում իրենց մասնակցությունը հաստատել են շուրջ 60 բեյսջամփերներ` Շվեյցարիայից, Ռուսաստանից, Պորտուգալիայից, Գերմանիայից, Ֆրանսիայից և այլ երկրներից: Բոլոր մարզիկները ստորագրել են համաձայնագիր, որի համաձայն` իրենք են պատասխանատվություն կրում պարաշյուտով թռիչքի ժամանակ ծագած ֆորսմաժորային իրավիճակների համար:
«Base Fest»-ի ժամանակ «ՏաԹևեր» ճոպանուղուն հարակից տարածքում կազմակերպվելու են տարատեսակ մարզական միջոցառումներ։ Բացի այդ, օրվա ընթացքում, բոլոր ցանկացողների համար բաց է լինելու վոլեյբոլի հրապարակը: Փառատոնի հյուրերի և մասնակիցների բարձր տրամադրությունն ապահովելու է հրավիրված DJ-ը:
«Base Fest»-ի նպատակն է ներկայացնել Հայաստանը` որպես ակտիվ հանգստի համար նախատեսված հետաքրքիր տուրիստական ուղղություն:
«ՏաԹևեր» աշխարհի ամենաերկար հետադարձելի ճոպանուղու գործարկումը, որը տեղի ունեցավ 2012 թ.-ի հոկտեմբերի 16-ին հարյուրավոր հյուրերի և Հայաստանի բարձրագույն ղեկավարության ներկայությամբ, նշանավորեց Հայաստանի ազգային մրցունակության հիմնադրամի կողմից իրականացվող 45 մլն դոլար արժողությամբ «Տաթևի վերածնունդ» մասշտաբային նախագծի մեկնարկը։
Ճոպանուղու երկարությունը 5,7 կմ է, նրա ամենաբարձր կետը՝ 330 մետր, մեկ ուղղությամբ ճանապարհը, Հալիձոր գյուղից դեպի Տաթևի հայտնի միջնադարյան վանքը, կազմում է 11 րոպե։
ՏաԹևեր ճոպանուղին Գինեսի ռեկորդների գրքի վկայական է ստացել՝ պատշոնապես ամրագրելով աշխարհի ամենաերկար ճոպանուղու կարգավիճակը։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
