Աշխարհի 500 լավագույն բուհերի ցանկում պետք է ունենանք առնվազն 4 բուհ. փոխնախարար

ԵՐԵՎԱՆ, 21 փետրվարի./Նովոստի Արմենիա/. ՀՀ կրթության, գիտության, մշակույթի և սպորտի նախարարությունը հանրային քննարկման է ներկայացրել ‹‹Հայաստանի Հանրապետության կրթության՝ մինչև 2030 թ.-ը զարգացման պետական ծրագիրը››: 

Փոխնախարար Կարեն Թռչունյանը այսօր կայացած ասուլիսի ժամանակ ներկայացրեց բարձրագույն կրթության ոլորտում նախատեսվելիք անելիքներն ու ծրագրերը։

«Ինչպես մասնագիտական կրթության և ուսուցման ոլորտում, այս պարագայում նույնպես պետք է հասնենք այն բանին, որ բուհերի շրջանավարտները կարողանան աշխատե`լ ըստ իրենց ձեռք բերած մասնագիտության»,- նշեց Թռչունյանը։

Փոխնախարարի դիտարկմամբ՝ ԿԳՄՍ նախարարությունը նախատեսում է բուհերի տարբեր մասնագիտությունների համար ֆինանսավորման նոր համակարգ մշակել։

«Տարբեր բուհերի համար ֆինանսավորման մեխանիզմները տարբեր կլինեն։ Այս ամենի համար պետք է աշխատանքային խմբեր ստեղծվեն: Մեր հաջորդ կարևոր նպատակն այն է, որ մինչև ծրագրի ավարտը հասնել նրան, որ առնվազն չորս բուհ ընդգրկված լինի միջազգային վարկանիշային աղյուսակների լավագույն 500-ի մեջ: Կարծում եմ, որ կարող ենք հասնել դրան, եթե ապահովենք որակյալ կրթության բոլոր անհրաժեշտ պայմանները»,-ասաց փոխնախարարը։

Նա ընգծեց, որ մեկ այլ թիրախ էլ լինելու է օտարերկրյա ուսանողների աճին նպաստելը։

ԿԳՄՍ փոխնախարար Արթուր Մարտիրոսյանն էլ իր հերթին հավելեց, որ Հայաստանը նախատեսում է ընդլայնել հայագիտական կենտրոնները, որակապես բարելավել դրանք, ինչպես նաև իրականացնել սփյուռքի ուսուցիչների վերապատրաստում։ 

«Մշակել ենք 3 ռազմավարական ուղղություն` ներառական կրթության միջավայրի, կրթության կառավարման համակարգի ստեղծում, ինչպես նաև մրցունակության ապահովում։ Մենք նաև խնդիր ունենք հայկական կրթական պրոդուկտներն արտահանելու մասով, ինչպես օրինակ ԹՈւՄՈ-ն է։ Պետք է կարողանանք աշխարհի հետ համահունչ զարգանալ»,- ընդգծեց Մարտիրոսյանը։–0–