Հանգստյան օրերի` ապրիլի 23–24–ի գլխավոր նորությունները

ԵՐԵՎԱՆ, 25 ապրիլի./Նովոստի–Արմենիա/. «Նովոստի–Արմենիա» գործակալությունը ներկայացնում է հանգստյան օրերի` ապրիլի 23–24–ի ամենահետաքրքիր նորությունների սեփական տարբերակը։

• Համայն հայությունն ապրիլի 24–ին նշեց 1915 թ.–ին Օսմանյան կայսրությունում տեղի ունեցած Հայոց ցեղասպանության 101–րդ տարելիցը։Ամեն տարի՝ ապրիլի 24-ին, Երևանից, Հայաստանի մարզերից և արտերկրից հարյուր հազարավոր մարդիկ ծաղիկներ են դնում Ցեղասպանության զոհերի հիշատակը հավերժացնող Ծիծեռնակաբերդի հուշահամալիրին՝ հիշատակելով Օսմանյան Թուրքիայում 1915-1923 թթ. բոլոր զոհվածներին։

• Ապրիլի 24–ի նախօրեին Երևանում ՀՅԴ–ի կազմակերպած ջահերով երթի մասնակիցները վառեցին Թուրքիայի և Ադրբեջանի դրոշները։ Այնուհետև մասնակիցները երթով շարժվեցին դեպի Ծիծեռնակաբերդի հուշահամալիր։

• Ապրիլի 24–ին Երևանում հանձնվեց Նոբելյան խաղաղության մրցանակի անալոգ համարվող Aurora Prize for Awakening Humanity մրցանակը։ Առաջին դափնեկիրը դարձավ Մարգարիտ Բարանկիցեն: Բարանկիցեն Բուրունդիի «Խաղաղության տուն» (Maison Shalom) խնամքի տուն և REMA հիվանդանոցից հազարավոր կյանքեր է փրկել և հոգ տարել որբերի ու փախստականների համար Բուրունդիի քաղաքացիական պատերասմի տարիներին: Երբ սկսվել է պատերազմը, Բարանկիցեն, ով պատկանում է տուտսի ցեղախմբին, փորձել է թաքցնել հարևան 72 խութուների` նրանց փրկելու համար: Սակայն նրանց գտել և սպանել են` ստիպելով Բարանկիցեին ներկա լինել նրանց գնդակահարմանը: Դրանից հետո նա սկսել է երեխաների և փախսռականների փրկելու իր աշխատանքը: Մարգերիտ Բարանկիցեն փրկել է մոտ 30 հազար երեխաների, իսկ 2008 Թվականին բացել է հիվանդանոց, որտեղ այսօրվա դրությամբ բժշկական օգնություն են ստացել մոտ 80 հազար մարդիկ: 

• Ապրիլի 23–ին Երևանում անցկացվեց «Ընդդեմ ցեղասպանության հանցագործության» երկրորդ գլոբալ ֆորումը։ Ֆորումի մասնակիցները քննարկեցին ցեղասպանությանն ու արտաքսմանը վերաբերող հարցեր, ինչպես նաև ցեղասպանությունների կանխարգելմանն ու փախստականների պաշտպանությանը վերաբերող միջոցները։
  

• Ռուսաստանը Հայաստանի և Ադրբեջանի հարաբերություններում հավասարության նշան չի դնում, ասաց լրագրողներին կիրակի ՀՀ–ում ՌԴ արտակարգ և լիազոր դեսպան Իվան Վոլինկինը` պատասխանելով Հայաստանին և Ադրբեջանին զենք վաճառելու վերաբերյալ հարցին:«Այստեղ ամենևին խոսքը հավասարության մասին չէ, Հայաստանը Ռուսաստանի ռազմավարական դաշնակիցն է, իսկ Ադրբեջանը` ռազմական գործընկերը, դրանք ամբողջովին տարբեր մակարդակներ են, և ոչ մի հավասարության նշանի մասին խոսք չկա», - ասաց Վոլինկինը։–0–