ԵՐԵՎԱՆ, 18 հոկտեմբերի./Նովոստի–Արմենիա/. Հայաստանում հետպատերազմական շրջանում պետական ֆինանսավորմամբ իրականացվող հոգեբանական աջակցության ծրագրի շահառու է դարձել արդեն մոտ 1150 հոգի:
Այս մասին այսօր հրավիրված ասուլիսում ասաց հոգեբանական վերականգնման ծառայությունների մատուցման ծրագրի կառավարիչ Արտակ Գրիգորյանը:
Նրա խոսքով, այս պացիենտների հետ արդեն անցկացվել է ավելի քան 6200 սեանս, իսկ մինչև տարեվերջ սեանսների թիվը հավանաբար կհասնի 9500-ի:
«Ծրագրին մասնակցում են 60-ից ավել հոգեբաններ, ովքեր աշխատում են այս պացիենտների հետ ոչ միայն Երևանում, այլ նաև մարզերում՝ շարժական խմբերի տեսքով»,-ասաց Արտակ Գրիգորյանը:
Արտակարգ իրավիճակների նախարարի խորհրդական Անդրանիկ Հակոբյանի խոսքով էլ այս ծրագրի իրագործման համար կառավարությունը 100 մլն դրամ է հատկացրել, և աշխատանքներն արդեն մոտ 4 ամիս է տարվում են, իսկ ծրագիրը համակարգում է Արտակարգ իրավիճակների նախարարությունը:
«Ծրագրի շահառու կարող են լինել պատերազմի արդյունքում տուժած մարդիկ՝ զոհված զինծառայողների ընտանիքները, հաշմանդամություն ստացած զինծառայողներն ու նրանց ընտանիքի անդամները, պատերազմական գործողությունների մասնակիցները, այդ թվում` կամավորները, ինչպես նաև տեղահանվածները»,-ասաց նախարարի խորհրդականը:
Ինչպես նշեց Երևանի պետական բժշկական համալսարանի Բժշկական հոգեբանության ամբիոնի վարիչ Խաչատուր Գասպարյանը, մի շարք ախտանիշեր կարող են փաստել, որ մարդը հոգեբանական աջակցության կարիք ունի:
Երբեմն պացիենտը չի հասկանում, որ օգնության կարիք ունի, սակայն դա կարող են նկատել իրեն շրջապատող մարդիկ:
«Եթե դուք նկատում եք, որ պատերազմի հետ առնչված մարդը ունի ուշադրության հետ կապված խնդիրներ, տրամադրության փոփոխություններ, չափից ավելի ուրախ տրամադրություն, որը կարող է շեշտակի բացասական դառնալ, կամ եթե նկատում եք, որ այդ մարդու մոտ առկա է տագնապայնություն, գերզգոնություն, եթե նա շատ կտրուկ է վերաբերվում որոշ հարցերին, անսպասելի ռեակցիաներ է ունենում, եթե նկատում եք անքնություն, ապրումներ, որոնք թույլ չեն տալիս ապրել իրական կյանքով, այդ ամենը նշանակում է, որ նա օգնության կարիք ունի»,-ընդգծեց Գասպարյանը:
Մասնագետի խոսքով՝ պետք չէ վախենալ հոգեբանին դիմելուց: Հոգեբանական ծառայությունը չի վնասելու նրանց, ընդհակառակը, օգնելու է, որպեսզի ավելի արագ վերականգնվեն:
«Այսօր հասել ենք մի կետի, երբ մի շահառու մեկ ուրիշին ներգրավվում է ծրագրին: Օրինակ՝ ինձ առավոտյան մի տղա հարցրեց, արդյոք իր ընկերը ևս կարող է դիմել: Եվ սա շատ տիպիկ է, քանի որ երբ կարողանում ենք մատուցել պատշաճ ծառայություն, անպայման դրական արձագանքներ են լինում»,-ամփոփեց Գասպարյանը:
Փորձագետի խոսքով, մինչև տարեվերջ կանխատեսվում է ևս 300-350 շահառուհի սպասարկում:–0–
