ԵՐԵՎԱՆ, 3 հոկտեմբերի./Նովոստի–Արմենիա/. ՀՀ նախագահի աշխատակազմի հաշվեկշռից հանվել է Airbus ինքնաթիռը, իսկ նախագահի բյուջետային ծախսերը կրճատվել են 741 մլն դրամով, շաբաթ օրն ԱԺ հանձնաժողովներում 2019թ.–ի պետբյուջեի նախագիծը ներկայացնելիս տեղեկացրեց ՀՀ նախագահի աշխատակազմի ղեկավար Էմիլ Տարասյանը։
«Նախագահի ծախսերի բյուջեն 2019 թ.–ին նախատեսված է 1.183 մլրդ դրամի չափով, ինչը կազմում է 2018 թ.–ի բյուջեի 61,5%–ը։ 532 մլն դրամի չափով կրճատումների հիմնական մասը կապված է աշխատակիցների աշխատավարձերի և բոնուսների հետ, իսկ հաջորդ տարի նախատեսվում է ավելի մեծ կրճատում, քանի որ օրենքով նախատեսվում է 150 դրույք` ներկա 180–ի փոխարեն», – ասաց Տարասյանը։
Загружается новость ... "Лево"
Նա նաև տեղեկացրեց, որ հաշվեկշռից ինքնաթիռը հանելու կապակցությամբ կրճատվում են նաև մոտ 200 մլն դրամի չափով ծախսերը, որոնք նախատեսված էին ինքնաթիռի շահագործման համար։ Մոտ 10 մլն դրամով կրճատվում են նաև տրանսպորտային միջոցների համար վառելիք ձեռք բերելու միջոցները։
«5 մլն դրամով ծախսերի ավելացում նախատեսված է միայն մեկ հոդվածով. դրանք աշխատակազմի կադրերի վերապատրաստման համար նախատեսված միջոցներն են», – ասաց Տարասյանը։
Հայաստանի պետբյուջեի նախագծի համաձայն, եկամտի մասը կազմում է 1,5 տրիլիոն դրամ, ծախսերը` 1,6 տրիլիոն դրամ, պակասուրդը` մոտ 150 մլրդ դրամ։ Պետբյուջեի նախագծով, կապիտալ ծախսերը, 2018 թ.–ի համեմատ, կաճեն. 2018 թ.–ին սպասված ՀՆԱ–ի 2,3%–ի փոխարեն 2019 թ.–ին դրանք կկազմեն ՀՆԱ–ի 3%–ը։
Ծախսերի կառուցվածքում հիմնական տեսակարար կշիռը բաժին է հասնում սոցիալական և մշակութային ոլորտներին` բոլոր ծախսերի մոտ 44%–ը, պաշտպանությանը, անվտանգությանն ու հասարակական կարգի պահպանմանը նախատեսված է մոտ 24%, տնտեսության իրական հատվածին` 12,3%, պետբյուջեի մոտ 10%–ը կուղղվի պետական պարտքի սպասարկմանը, 3,2%–ը` համայնքային բյուջեների դոտացիաներին, 5,8%–ը` պետական իշխանության մարմինների ծախսերին։ ($1 – 486,55 դրամ)–0–
