ԵՐԵՎԱՆ, 5 հոկտեմբերի. /Նովոստի-Արմենիա/. ԱԱ-2018-ի ընտրական փուլում Հայաստանի հավաքականն իր հարկի տակ հանդիպեց Լեհաստանի հավաքականի հետ:
Մեր ընտրանին սեփական հարկի տակ պարզապես խայտառակ պարտություն կրեց՝ 1:6 հաշվով, հայտնում է
armsport.am-ը:
Խաղի արդեն երկրորդ րոպեին լեհերի գրոհն ավարտվեց գոլով. Լուկաշ Պիշչեկի փոխանցումից հետո Կամիլ Գրոսիցկին գրավեց Գրիգոր Մելիքսեթյանի պաշտպանած դարպասը:
Հայկական թիմի մարզիկները փորձեցին բաց թողած գոլից հետո չհանձնվել, ինչ-որ չափով տիրել նախաձեռնությանը, սակայն մրցակիցը մի գլուխ բարձր էր իր առաջատար Ռոբերտ Լևանդովսկու գլխավորությամբ, որը կարողացավ 3 անգամ խոցել Գրիգոր Մելիքսեթյանին՝ նաև անձնական ռեկորդ գրանցելով:
«Բավարիայի աստղը Լեհաստանի հավաքականի կազմում իր գոլերի թիվը հասցրեց նախ 49-ի՝ դառնալով հավաքականի պատմության լավագույն ռմբարկուն, այնուհետև՝ նաև 50-րդ գոլը խփեց և գերազանցեց սեփական ցուցանիշը»,- նշվում է գրառման մեջ:
Լևանդովսկու՝ ազատ հարվածի խաղարկումից հետո գնդակն անդրադարձով հայտնվեց հայկական թիմի դարպասում:
5-րդ գոլը մեր ընտրանու դարպասն ուղարկեց Յակուբ Բլաշիկովսկին՝ խաղի 58-րդ րոպեին գրավելով Գրիգոր Մելիքսեթյանի դարպասը, իսկ հանդիպման վերջնահաշիվը խաղի 89-րդ րոպեին ձևակերպեց Ռաֆալ Վոլսկին:
Կայքի հաղորդմամբ, Հայաստանի հավաքականի կազմում հեղինակության գնդակը հեղինակեց պաշտպան Հովհաննես Համբարձումյանը, որը Մխիթարյանի խաղարկած անկյունայինից հետո գլխի հարվածով գրավեց Վոյցեխ Շչեսնիի դարպասը:
ԱԱ-2018-ի ընտրական փուլի վերջին հանդիպումը Հայաստանի հավաքականի կանցկացնի հոկտեմբերի 8-ի՝ արտագնա խաղում մրցելով Ղազախստանի հավաքականի հետ: -0-