9 գնդակ` 2.5 մետր հեռավորությունից․ միջազգային կարգի սպորտի վարպետ Վարազդատ Հակոբյանը սահմանել է նոր ռեկորդ (ՎԻԴԵՈ)

ԵՐԵՎԱՆ, 7 փետրվարի․/Նովոստի–Արմենիա/․ Մարզիչ, ուժային եռամարտի աշխարհի չեմպիոն, Դյուցազնագրքի կրկնակի ռեկորդակիր, միջազգային կարգի սպորտի վարպետ, Սևան քաղաքի բնակիչ Վարազդատ Հակոբյանը, որը նաև Սևան համայնքի ավագանու անդամ է, օրերս իր ռեկորդների զինանոցը հարստացրեց նոր ռեկորդով, հայտնում են Սևանի համայնքապետարանից։

Վարազդատն այս անգամ մեջքով շրջված դիրքով բասկետբոլի զամբյուղի մեջ է նետել միանգամից միմյանց ամրացված 9 գնդակ` 2.5 մետր հեռավորությունից, որը հաջորդել է 6 գնդակով` դեմքով դեպի բասկետբոլի զամբյուղը նետում կատարած ռեկորդին։

Ռեկորդները գրանցվել են հայկական «Դյուցազնագրքում», որն արդեն 20-րդն է։ Ինչպես Վարազդատն է նշում, հաղթանակները, առավել ևս սպորտում, հեշտ չեն տրվում, սակայն կա ձգտում, որին նա գնում է ընդառաջ ամենօրյա պարապմունքների և նպատակասլացության շնորհիվ։

Հիշեցնենք, որ Վարազդատը, դեռևս 2019 թվականին 23 տոննա գնացքը միջնամատով քաշելով 3մ 57սմ տարածությամբ, սահմանել է նոր ռեկորդ։
Հաջորդ ռեկորդը Վարազդատը փորձելու է սահմանել ինքնաթիռով։–0–