ԵՐԵՎԱՆ, 10 նոյեմբերի. /Նովոստի–Արմենիա/. Հայաստանի հավաքականի մարզիչ Արթուր Պետրոսյանը Չեռնոգորիային ֆավորիտ է համարում 2018 թ.–ի աշխարհի առաջնության ընտրական փուլի` Հայաստան–Չեռնոգորիա խաղում, սակայն հուսով է, որ իր սաներին կհաջողվի հասնել դրական արդյունքի։
Նրա կարծիքով, ընդհանուր առմամբ թիմերի շանսերը հավասար են։ «Մենք կանենք ամեն ինչ դրական արդյունքի համար», – ասաց Պետրոսյանը։
Պատասխանելով «Նովոստի–Արմենիա» հարցին այն մասին` արդյոք դրական կհամարվի՞ ոչ–ոքի արդյունքը` հայկական թիմի մարզիչը նշեց, որ իր սաները կփորձեն հաղթել, սակայն ցանկացած դրական արդյունք տվյալ հանգամանքներում կլինի քայլ առաջ։
Խոսելով թիմում առկա
կորուստների մասին` նա նշեց, որ վաղվա խաղում հանդես չի գա կիսապաշտպան Դավիթ Մանոյանը։ Միաժամանակ մարզիչն ավելացրեց, որ հավաքականի առաջատարը` «Մանչեսթեր Յունայթեդի» կիսապաշտպան Հենրիխ Մխիթարյաը, իդեալական մարզավիճակում է։
Պետրոսյանը խոստացավ, որ թիմը վաղվա հանդիպման ժամանակ կփորձի վերականգնել երկրպագուների վստահությունն ու վերադարձնել նրանց մարզադաշտ։
Մարզչի խոսքով, նա քայլ առ քայլ է լուծելու թիմի խնդիրները, քանի որ դրանք չափազանց շատ են և սխալ կլիներ փորձել դրանք լուծել միանգամից։ Նա նաև ընդգծեց, որ թիմում տիրում է նորմալ հոգեբանական վիճակ։
Որակավորման փուլում Հայաստանի հավաքականը զբաղեցնում է վերջին տեղը E խմբում` վերջին երեք խաղերի արդյունքում չվաստակելով ոչ մի միավոր։ Յոթ միավորով առաջատարն են Չեռնոգորիան և Լեհաստանը։ Ռումինիայի հավաքականը հավաքել է հինգ միավոր, դանիացիները` երեք միավոր, Ղազախստանի հավաքականը` երկու միավոր։ –0–
