ԵՐԵՎԱՆ, 16 դեկտեմբերի./Նովոստի–Արմենիա/. ԱԱԾ տնօրեն և ՀՖՖ նախագահ Արթուր Վանեցյանը «Ազատություն» ռ/կ–ին տված հարցազրույցում սենսացիոն հայտարարություն է արել Հայաստանում ֆուտբոլի հետագա զարգացման մասին։
«Դժվարին բանակցություններից հետո մեզ հաջողվեց Հայաստան հրավիրել լեգենդար ֆուտբոլիստի, ում անունը ես չեմ կարող նշել։ Դա տեղի կունենա հունվարի 6–ին։ Նա ֆուտբոլի լեգենդ է, ով համաձայնվել է այցելել Հայաստան և աշխատել ֆուտբոլի զարգացման ռազմավարության վրա։ Այն երկրները, որտեղ նա արդեն աշխատել է, դարձել են առաջատարներ», – նշել է Վանեցյանը։
Նա միայն ավելացրել է, որ իր նշած ֆուտբոլիստը բազմիցս դարձել է աշխարհի և Եվրոպայի չեմպիոն։
«Ֆուտբոլի ժամանակակից աստղերից շատերը եղել են նրա սաները։ Նա միշտ մարզել է երիտասարդական հավաքականներ։ Եվ այսպես, մենք հրավիրել ենք մի անձնավորության, ով կդնի մեր հաջողությունների հիմքը։ Ոչ ոք չէր հավատում, որ նա կհամաձայնվի գալ Հայաստան», – ասել է Վանեցյանը։
Նա վստահություն է հայտնել, որ Հայաստանին փայլուն ֆուտբոլային ապագա է սպասվում և ևս մեկ անգամ հիշեցրել է մանկապատանեկան ու մասսայական ֆուտբոլի զարգացման անհրաժեշտության մասին։
«Անհրաժեշտ են դաշտեր, գնդակներ և մարզիչներ։ Ինչ վերաբերում է դաշտերին, ապա ես այցելել եմ Ցյուրիխ, հանդիպել FIFA–ի նախագահի հետ և պայմանավորվել, որ ՀՖՖ–ն ֆինանսավորում կստանա FIFA-ից։ Մեր նպատակն է առաջիկա հինգ տարում ստեղծել 700 դաշտ տարբեր մարզերում։ Մարտունիում կկառուցվի ֆուտբոլային դպրոց, մենք արդեն դպրոցներ ենք կառուցում Սիսիանում, Արմավիրում և Էջմիածնում», – նշել է Վանեցյանը։–0–