ԵՐԵՎԱՆ, 6 մարտի./Նովոստի–Արմենիա/. Եվրոպական հանձնաժողովի նախագահ Ժան-Կլոդ Յունկերը պատրաստ է անձամբ օժանդակել Հայաստան–ԵՄ վիզաների ազատականացմանը։ Այս մասին նա ասել է նախօրեին Հայաստանի վարչապետ Նիկոլ Փաշինյանի հետ համատեղ ճեպազրույցում, հայտնում է կառավարության մամուլի ծառայությունը։
Նա նշել է, որ վարչապետի հետ հանդիպմանը անդրադարձ է կատարվել վիզաների ազատականացման գործընթացին, որը երկկողմ գործակցության առաջնահերթություններից է:
Երկուստեք կարևորվել է այդ ուղղությամբ երկխոսության մեկնարկը: Ժան-Կլոդ Յունկերը նշել է, որ վիզաների ազատականացումը կնպաստի ոչ միայն պետությունների և կառավարությունների մակարդակով համագործակցության խորացմանը, այլև կխթանի մարդկային կապերի սերտացումը, և ԵՄ-ն պատրաստ է աջակցել այս գործընթացին:
«Ես անձամբ պատրաստ եմ օժանդակել այդ գործընթացին իմ հնարավորությունների շրջանակում, և վարչապետի հետ հանդիպման ընթացքում մենք նշել ենք, որ կընդլայնենք ավելի սերտ երկխոսություն ԵՄ անդամ այն երկրների հետ, որոնք հետևողական են այս հարցում»,– ասել է Յունկերը։
Загружается новость ...
"Право"
Նա նշել է, որ Եվրահանձնաժողովը կողմ է վիզային ռեժիմի ազատականացման բանակցությունների շուտափույթ մեկնարկին։
«Դա կարևոր է ինչպես Հայաստանի, այնպես էլ Եվրամիության համար։ Ցանկանում ենք, որ ավելի մեծ թվով հայեր ճամփորդեն Եվրոպական Միությունում և հակառակը։ Մենք ուզում ենք, որ մարդիկ ազատ ճանապարհորդեն, հայերը կարողանան ազատ գալ Եվրոպա առանց վիզաների` մեզ ավելի լավ ճանաչելու համար»,– ասել է Յունկերը։
Նա նաև նշել է, որ մշակվել է հարևանների հետ կապերի ամրապնդման վեց ծրագիր` ընդգծելով մարդկանց միջև շփումների կարևորությունը։
Փաշինյանն իր հերթին նշել է, որ ԵՄ ղեկավարության հետ հանդիպումների ժամանակ քննարկել է վիզային ռեժիմի ազատականացման երկխոսություն սկսելու կարևորությունը, ինչը երկկողմ հարաբերությունների գերակայություն է մնում։
«Խնդրեցի Եվրահանձնաժողովի ղեկավար Յունկերին անձնական լուման ներդնել այդ հարցի լուծման մեջ։ Վերահաստատեցի նաև Հայաստանի կառավարության հավատարմությունը «2020–ի 20 նախադրյալներ» փաստաթղթի կատարմանը և արդյունքների ներկայացմանը»,– ասել է Փաշինյանը։ -0-
