ԵՐԵՎԱՆ, 11 փետրվարի․/Նովոստի–Արմենիա/․ ՀՀ վարչապետ Նիկոլ Փաշինյանը The Telegraph-ին տված հարցազրույցում ուղիղ պատասխան չտվեց այն հարցին՝ հնարավո՞ր է, արդյոք ՌԴ նախագահ Վլադիմիր Պուտինի ձերբակալությունը և հանձնումը Հաագա, եթե նա այցելի Հայաստան։
Նշենք, որ նման պարտավորություն է նախատեսված Միջազգային քրեական դատարանին անդամակցությամբ, որին Հայաստանը միացել է այս տարվա փետրվարի 1–ին։
Թղթակցի այն ենթադրությանը, թե Փաշինյանը կարող է զանգահարել Վլադիմիր Պուտինին և ասել, որ նա ուղղակի չգա, քանի որ հնարավոր չէ երաշխավորել, որ նա չի ձերբակալվի, ՀՀ վարչապետը պատասխանեց․ «Ես չեմ կարծում թե Վլադիմիր Վլադիմիրին իմ խորհուրդների կարիքն ունի»։
«Քիչ չեն այն իրավաբանները, ովքեր ասում են, որ պետության գործող ղեկավարներն իրենք այդ կարգավիճակի բերումով ունեն անձեռնմխելիություն, անհաղթահարելի անձեռնմխելիություն: Նկատի ունեմ՝ դա իրավական խնդիր է, քաղաքական հարց չէ, որը ես պետք է քննարկեմ և որին պետք է արձագանքեմ», – ասել է Փաշինյանը։
Նրա խոսքով, Հայաստանի կողմից Հռոմի ստատուտի վավերացման որոշումը ծառայում է Հայաստանի անվտանգության մակարդակի բարձրացմանը:–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում