ԵՐԵՎԱՆ, 3 հոկտեմբերի. /Նովոստի–Արմենիա/. Երևանում հոկտեմբերի 5–7–ը կանցկացվի Եվրասիական գործընկերության երկրորդ միջազգային գործարար համաժողովը, հաղորդում է համաժողովի մամուլի ծառայությունը։
Միջոցառումը նախաձեռնել է «Եվրասիական գործընկերության միջազգային համաժողով» ՀԿ–ի և Ռուսաստանի հայերի միության նախագահ, ՅՈւՆԵՍԿՕ–ի բարի կամքի դեսպան Արա Աբրահամյանը։
«Այսօր Հայաստանը Եվրասիական միության իր գործընկերների հետ կարող է դառնալ համագործակցության կարևորագույն օղակ տնտեսական տարբեր տարածքների և ինտեգրացիոն միությունների միջև (ՀՇԿ, ԲՐԻԿՍ, ԵՄ և այլք)», – նշել է Աբրահամյանը։
Նա կարծում է, որ համաժողովը կարող է բացել նոր ներդրումային հնարավորություններ ԵՏՄ երկրների, այդ թվում` Հայաստանի Հանրապետության համար, որտեղ համաժողովը դարձել է ամենամյա և կնպաստի երկրի վարկանիշի ու հեղինակության բարձրացմանը։
«Կոչ եմ անում ակտիվորեն մասնակցել Եվրասիական գործընկերության միջազգային համաժողովին։ Հենց Ձեր ակտիվ մասնակցությունը, փոխշահավետ տնտեսական համագործակցության զարգացման հարցում նոր և արդյունավետ մոտեցումների համատեղ որոնումը կձևավորի եվրասիական գործընկերության հետագա ուղիներն ու հեռանկարները», – նշել է Աբրահամյանը։
Համաժողովի աշխատանքներին կմասնակցեն կառավարությունների, գործարար շրջանակների և փորձագիտական հանրության ներկայացուցիչներ, համաշխարհային ընկերությունների ղեկավարներ` Ռուսաստանից, Հայաստանից, Բելառուսից, Ղազախստանից, Ղրղըզստանից, ինչպես նաև ԱՄՆ–ից, Չինաստանից, Քաթարից, Հարավային Կորեայից, Հնդկաստանից և այլ երկրներից։
Այս միջոցառման նպատակն է ստեղծել մշտապես գործող տեղեկատվական և բանավեճային հարթակ` ԵՏՄ, ԱՊՀ, ԲՐԻԿՍ, ՀՇԿ, ԵՄ և այլ միությունների գործարար հանրության երկկողմ և բազմակողմ համագործակցության համար։
Համաժողովի շրջանակում տեղի կունենա ԵՏՄ պետությունների արդյունաբերության նախարարների խորհրդակցությունը, ինչպես նաև կկազմակերպվեն նստաշրջաններ` նվիրված բժշկական արդյունաբերության, թեթև արդյունաբերության, ոսկերչության, արտադրական ինտեգրման, ռադիոէլեկտրոնիկայի և բարձր տեխնոլոգիաների ոլորտում համագործակցության հարցերին։
Եվրասիական գործընկերության առաջին միջազգային համաժողովն անցկացվել է Երևանում 2016 թ.–ի հոկտեմբերի 13–16–ը։ Համաժողովին մասնակցել է շուրջ 800 ներկայացուցիչ` աշխարհի 37 երկրներից։ Միջոցառումն անցկացվել է բարձր մակարդակով. նիստերին, գործարար հանդիպումներին և քննարկումներին մասնակցել և ելույթ է ունեցել ՀՀ վարչապետ Կարեն Կարապետյանը։
Համաժողովն անցկացվում է երկրորդ տարին անընդմեջ Եվրասիական տնտեսական հանձնաժողովի, ՀՀ կառավարության և ՌԴ արդյունաբերության և առևտրի նախարարության հետ համատեղ (համաժողովի օպերատոր` «Ռոսկոնգրես»)։ Մանրամասները` կայքում։–0–
