ԵՐԵՎԱՆ, 29 օգոստոսի. /Նովոստի–Արմենիա/. Նախօրեին՝ օգոստոսի 28-ին, դաժան ու ողբերգական ավտովթար է տեղի ունեցել Արմավիրի մարզում։
Shamshyan.com–ի հաղորդմամբ, ժամը 20։30-ի սահմաններում Քարակերտ գյուղից դեպի Գյումրի տանող ճանապարհահատվածում բախվել են ՎԱԶ 2107 մակնիշի ավտոմեքենան և վրացական համարանիշներով SCANIA մակնիշի բեռնատարը։
Վթարի հետևանքով 2 մարդ տեղում մահացել է, երկուսն էլ մարմնական վնասվածքներով տեղափոխվել են Արմավիրի բժշկական կենտրոն, որտեղ նրանք ևս մահացել են։
Փաստի առթիվ հարուցվել է քրեական գործ ՀՀ ՔՕ 242 հոդվածի 3-րդ մասի (ճանապարհատրանսպորտային պատահար, որն անզգուշությամբ առաջացրել է 2 և ավելի մարդու մահ) հատկանիշներով։
Ոստիկանությունն ու քննչական բաժինը պարզում են վարորդների և մահացածների ինքնությունը։
Կայքի հաղորդմամբ, դեպքի վայրում հավաքվածները նշել են, որ մահացածները հայր ու որդիներ են, և երեխաները 7, 14 և 15 տարեկան էին։
Պարզվել է նաև, որ «07»-ը մինչև վրացական համարանիշներով բեռնատարի հետնամասին մխրճվելը բախվել է Աշտարակ քաղաքի բնակիչ 68-ամյա Հակոբ Բունիաթյանի վարած Opel Vectra մակնիշի ավտոմեքենային։
Կայքի տեղեկություններով՝ «07»-ը վարել է Արմավիրի մարզի Լեռնագոգ գյուղի բնակիչ 42-ամյա Մարատ Արսենյանը, ով մահացել է, իսկ մյուս մահացածները նրա որդիներն էին՝ 15-ամյա Արթուր Արսենյանը, 14-ամյա Վահան Արսենյանը և 7-ամյա Արգիշտի Արսենյանը։–0–
