ԵՐԵՎԱՆ, 27 ապրիլի./Նովոստի–Արմենիա/. Այսօր փաստաբաններ Տիգրան Աթանեսյանն ու Արմեն Սողոմոնյանը հարձակման են ենթարկվել Տիգրան Աթանեսյանի գրասենյակում։
Հարձակվողներն են ՀՀ փաստաբանական դպրոցի տնօրեն Սիմոն Բաբայանը, ՀՀ փաստաբանների պալատի նախագահի արտաքին հարաբերությունների գծով խորհրդական Վրեժ Խաչիկյանը, ՀՀ փաստաբանների պալատի նախագահի խորհրդական Գևորգ Մկրտչյանը և ոմն Արսեն։
«Քիչ առաջ հարձակման ենթարկվեցի իմ գրասենյակում Արմեն Սողոմոնյանի հետ միասին արալեզների կողմից: Սպասում եմ ոստիկանությանը: Հարձակվողներն են Սիմոն Բաբայանը, Վրեժ խաչիկյանը, Գևորգ Մկրտչյանը և ոմն Արսեն», – գրել է Աթանեսյանը Facebook–յան իր էջում։
Tert.am–ի հաղորդմամբ, Աթանեսյանի վնասվածքները թեթև են, սակայն Արմեն Սողոմոնյանը բավական լուրջ վնասվածքներ ունի՝ հասցված կտրող-ծակող գործիքով։ Նա հոսպիտալացվել է։
Տիգրան Աթանեսյանի խոսքով՝ այս պահին ոստիկաններն իրականացնում են դեպքի վայրի զննություն:
Փաստաբան Երվանդ Վարոսյանը, ով դեպքի վայրում էր, նշել է, որ սենյակն «ամբողջովին արյան մեջ կորած է»։
ՀՀ փաստաբանների պալատի նախագահ Արա Զոհրաբյանն այս կապակցությամբ հայտարարություն է տարածել։
Հայաստանի Հանրապետությա փաստաբանների պալատը դատապարտում է ցանկացած բռնություն, ինչպես նաև վիրավորանք և զրպարտություն պարունակող հայտարարություններըև հրապարակումները, առավել ևս, երբ կողմերը փաստաբաններ են», – նշվում է հայտարարության մեջ։
Զոհրաբյանը նաև նշել է, որ ճշմարտությունը պետք է բացահայտվի, իսկ մեղավորները պետք է ենթարկվեն պատասխանատվության։
«Միևնույն ժամանակ հորդորում ենք զերծ մնալ զգացմունքային և չստուգված հայտարարություններից և միակողմանի տեղեկատվության հիման վրա կարծիք չձևավորել», – նշվում է ՀՀ փաստաբանների պալատի նախագահ Արա Զոհրաբյանի հայտարարության մեջ։
Հավելենք նաև, որ ՀՀ փաստաբանական դպրոցի տնօրեն Սիմոն Բաբայանը վաղը ասուլիս է հրավիրել։–0–
