ԵՐԵՎԱՆ, 15 հունիսի. /Նովոստի–Արմենիա/. Բաքվի Եվրախաղերը քաղաքական լուրջ հետևանքներ չեն ունենա, երկուշաբթի լրագրողներին ասաց Հայաստանի Ազգային ժողովի պատգամավոր Լևոն Մարտիրոսյանը։
«Ադրբեջանն ընդամենը շահել է Եվրոպական խաղերի անցկացման իրավունքը, ինչը մեծ պատիվ է այդ երկրի համար, և օգտագործել այն իր PR-ի համար։ Խաղերի շրջանակում անցկացվել են մի շարք պաշտոնական հանդիպումներ, սակայն չեմ կարծում, որ այդ ամենը կհանգեցնի ինչ–որ լուրջ քաղաքական հետևանքների»,– ասաց Մարտիրոսյանը
Նա նշեց, որ խոսքն այդ երկրի` խոշոր գումարներ ծախսելու պատրաստակամության մասին է այն դեպքում, երբ մի շարք եվրոպական երկրներ հրաժարվել են անցկացնել մկջոցառումն իրենց երկրում` «պարտվելով» Բաքվին։
«Եվ ես չեմ կարծում, թե որոշ պետությունների ղեկավարների այցերը և պաշտոնական այցերը Բաքու կարող են հանգեցնել լուրջ հետևանքների։ Ակնհայտ երևում է, որ եվրոպական երկրների մեծամասնության առաջնորդները և բազմաթիվ ԶԼՄ–ներ բոյկոտել են այդ միջոցառումը»,– ասաց Մարտիրոսյանը։
Միջազգային և պաշտպանության հարցերի հայկական ինստիտուտի ղեկավար Ստեփան Սաֆարյանն իր հերթին նշեց, որ բազմաթիվ եվրոպացիներ, տրամադրելով Բաքվին Եվրոպական խաղեր անցկացնելու իրավունք, հաշվի են առել նրա ցուցամոլության և ավելի շատ փող ծախսելու դրա հակվածությունը։
«Նմանատիպ միջոցառումներն Ալիևն օգտագործում է ոչ միայն անձնական PR-ի նպատակով, այլ նաև ուժերի ներքին մոբիլիզացման համար»,– ասաց Սաֆարյանը։
Ըստ նրա` Ադրբեջանն այսպիսով փորձում է իր ժողովրդին ապացուցել, որ իրենց երկիրը հաղթող է։
Միակ բանը, որ մտահոգում է փորձագետին, այն է, որ Իլհամ Ալիևը կարող է օգտագործել այն կապիտալը, որը կուտակվել է այդ քաղաքական միջոցառման համար, ռազմական սադրանքների նպատակով։
Քաղաքագետ Ալեքսանդր Մանասյանն իր հերթին հայտնեց, որ Եվրախաղերի անցկացումը Բաքվում նոր վարկանիշի ձևավորման և քրեական կերպարը թաքցնելու փորձ է։
«Մենք պետք է, ի վերջո, ասենք, որ չենք կարող գնալ այնտեղ, քանի որ Բաքվի հրապարակները դեռ հիշում են այրվող մարդկանց, զոհերի բղավոցները, որոնց դուրս էին նետում բարձրահարկ շենքերի պատուհաններից»,– ասաց Մանասյանը։
Եվրոպական առաջին օլիմպիական խաղերը, որոնք հետագայում պետք է անցկացվեն չորս տարին մեկ անգամ, անցկացվում են Բաքվում հունիսի 12–28–ը։ Մրցումների ընթացքում կխաղարկվի 253 կոմպլեկտ մեդալ` 20 մարզաձևում, որից 11–ով կխաղարկվեն Օլիմպիական ուղեգրեր, որը տեղի կունենա 2016 թ.–ին Ռիո դե Ժանեյրոյում։
Սպասվում է, որ մրցումներին կմասնակցեն մայրցամաքի բոլոր երկրները ներկայացնող ավելի քան 6 հազար մարզիկներ։–0–
