Մեր նպատակն է գեղեցիկ խաղ ցուցադրել և հաղթել. Սարգիս Հովսեփյան

ԵՐԵՎԱՆ, 12 հունիսի. /Նովոստի–Արմենիա/. Եվրոպայի 2016թ.–ի առաջնության ընտրական փուլի շրջանակում Պորտուգալիայի հավաքականի հետ նախատեսված խաղում Հայաստանի հավաքականի գլխավոր նպատակն է գեղեցիկ խաղ ցուցադրել և հաղթել, ուրբաթ հանդիպումից առաջ կազմակերպված ասուլիսի ժամանակ հայտարարեց Հայաստանի հավաքականի գլխավոր մարզչի ժամանակավոր պաշտոնակատար Սարգիս Հովսեփյանը։

2016թ.–ի Եվրոպայի առաջնության ընտրական փուլի շրջանակում Հայաստան–Պորտուգալիա հանդիպումը տեղի կունենա հունիսի 13–ին ժամը 20։00–ին Երևանի Հանրապետական մարզադաշտում։

«Լավ ֆուտբոլ խաղալու հնարավորություն ունենք, և մենք կանենք ամեն ինչ։ Իհարկե, մեզ մոտ են եկել համաշխարհային ֆուտբոլի աստղեր, սակայն առաջին անգամ չենք նրանց հետ հանդիպելու և հաջող խաղեր ենք ունեցել նրանց հետ», – ասաց Հովսեփյանը։

Նա նշեց, որ փոքր–ինչ անհանգիստ է, քանի որ մրցակիցը բավականին ուժեղ է։ «Սակայն ես ունեմ իմ մտադրություններն ու վստահ եմ, որ կկարողանանք անակնկալ մատուցել պորտուգալական թիմին», –հայտարարեց Հովսեփյանը։

Նա ավելացրեց, որ դաշտ դուրս կգան առավելագույնս պատրաստված խաղացողները, ովքեր 100 տոկոսով պատրաստ են հանդիպմանը։ «Իսկ այն ֆուտբոլիստները, ովքեր ամբողջովին պատրաստ չեն խաղին, կաջակցեն թիմին հետագայում», – նշեց Հովսեփյանը։

Անդրադառնալով Յուրա Մովսիսյանի բացակայությանը` մարզչի ժամանակավոր պաշտոնակատարը նշեց, որ նրա դիրքում կխաղա շատ ավելի մոտիվացված ֆուտբոլիստ։ Նա հրաժարվեց պատասխանել հայկական թիմի մարտավարության մասին հարցերին` հավելելով, որ իրականացված աշխատանքի արդյունքն ակնհայտ կդառնա խաղի ժամանակ։

Ընտրական խմբում Հայաստանի հավաքականը մեկ միավորով կիսում է վերջին տեղը Սերբիայի հավաքականի հետ։ Սակայն հայ ֆուտբոլիստներն անցկացրել են չորս հանդիպում` մեկ հանդիպումով ավել, քան սերբերը։

Ինը միավորով խմբի առաջատարը Պորտուգալիայի հավաքականն է, յոթական միավոր են վաստակել Ալբանիայի (3 հանդիպում) և Դանիայի (չորս հանդիպում) հավաքականները։–0–